নিয়মীয়া বাৰ্তা ডিজিটেল, ৮ জানুৱাৰীঃ মঙলবাৰে তিব্বতত ৬.৮ ৰিখটাৰৰ ভূমিকম্পৰ ফলত কমেও ১২৬জন লোকৰ মৃত্যু হোৱাৰ লগতে ১৮৮জন লোক আহত হয়। খবৰ অনুসৰি মাত্ৰ ৯ ঘণ্টাত ১০০ৰো অধিক সৰু-ডাঙৰ ভূমিকম্প অনুভৱ কৰা হৈছে। তিব্বতৰ লগতে চুবুৰীয়া দেশ নেপালতো ভূমিকম্পৰ কম্পন অনুভৱ কৰা হৈছিল, যাৰ বাবে অট্টালিকাবোৰ কঁপিবলৈ ধৰিলে আৰু মানুহ ঘৰৰ পৰা ওলাই আহিল। চীন ভূমিকম্প নেটৱৰ্ক চেণ্টাৰে (চিইএনচি) ভূমিকম্পৰ প্ৰাবল্য ৬.৮ হোৱাৰ বিপৰীতে আমেৰিকাৰ ভূতাত্ত্বিক জৰীপে ৭.১ বুলি প্ৰকাশ কৰিছে। আঞ্চলিক দুৰ্যোগ সাহায্য মুখ্য কাৰ্যালয়ৰ তথ্য অনুসৰি মঙলবাৰে (বেইজিং সময় অনুসৰি) পুৱা ৯:০৫ বজাত চীনৰ তিব্বত স্বায়ত্তশাসিত অঞ্চলৰ শ্বিগাটছেৰ ডিংৰি কাউন্টিত এই ভূমিকম্পটো সংঘটিত হয়। ইয়াৰ কেন্দ্ৰবিন্দু আছিল শ্বিগাট্চে চহৰৰ ডিংৰি কাউন্টিৰ ছ’গো চহৰত। উত্তৰ-পূব নেপালৰ খুম্বু হিমালয়ৰ পৰ্বতমালাৰ লোবুটছেৰ পৰা ৯০ কিলোমিটাৰ দূৰত্বত অৱস্থিত শ্বিগাজে। উত্তৰ-পূবত অৱস্থিত এইখন নেপাল-তিব্বত-ভাৰত ত্ৰি-সংযোগৰ পৰা অলপ দূৰৈত তিব্বতৰ শেষ সীমান্তৱৰ্তী চহৰ। এই অঞ্চল ছিকিমৰ সংলগ্ন। শিগাজেক শিগাষ্টে নামেৰেও জনা যায় যিটো ভাৰতৰ সীমান্তৰ ওচৰত। শ্বিগাট্চেক তিব্বতৰ অন্যতম পবিত্ৰ নগৰ বুলি গণ্য কৰা হয়। ই তিব্বতী বৌদ্ধ ধৰ্মৰ এক গুৰুত্বপূৰ্ণ ব্যক্তি পাঞ্চেন লামাৰ পৰম্পৰাগত আসন। তিব্বতত পাঞ্চেন লামা দালাই লামাৰ পিছত দ্বিতীয় শক্তিশালী আধ্যাত্মিক নেতা। চিইএনচিয়ে জনোৱা মতে, ১০ কিলোমিটাৰ গভীৰতাত সংঘটিত হৈছে এই ভূমিকম্প। ভূমিকম্পৰ কম্পন নেপালতো অনুভৱ কৰা হয় য’ত অট্টালিকাসমূহৰ ক্ষতিসাধন হয়। অৱশ্যে তাত কোনো প্ৰাণ হেৰুৱাব পৰা নাছিল। বিহাৰৰ বহু ঠাইতো ভূমিকম্পৰ কম্পন অনুভৱ কৰা হৈছিল যদিও কোনো লোকৰ প্ৰাণ বা সম্পত্তিৰ ক্ষতি হোৱা নাছিল। চীনৰ চৰকাৰী টেলিভিছনত সম্প্ৰচাৰিত ফুটেজত দেখা গৈছে যে শিশুকে ধৰি লোকক ধ্বংসাৱশেষৰ পৰা উলিয়াই ষ্ট্ৰেচাৰত লৈ চিকিৎসা শিবিৰলৈ লৈ যোৱা হৈছে। ভূমিকম্পৰ কেন্দ্ৰবিন্দু আছিল ডিংৰি কাউন্টিৰ টছ’গো চহৰ, য’ত ২০ কিলোমিটাৰ ব্যাসাৰ্ধৰ ভিতৰত প্ৰায় ৬,৯০০ লোকৰ জনসংখ্যা আছে। এই অঞ্চলৰ ২৭ খন গাঁও। ডিংৰি কাউন্টি দক্ষিণ তিব্বতৰ হিমালয়ৰ উত্তৰ ঢালত অৱস্থিত। ই হৈছে মাউণ্ট এভাৰেষ্টৰ উত্তৰ বেচ কেম্প, যাক তিব্বতৰ মাউণ্ট ক’মোলাংমা বুলি কোৱা হয়, যিটো বিশ্বৰ সৰ্বোচ্চ শৃংগ। ভূমিকম্পৰ পিছত এক সংবাদ মেলত বিষয়াসকলে জনোৱা মতে, ৩৪০০ৰো অধিক উদ্ধাৰকাৰী আৰু ৩৪০ জনৰো অধিক চিকিৎসা কৰ্মীক ভূমিকম্প ক্ষতিগ্ৰস্ত অঞ্চলটোলৈ প্ৰেৰণ কৰা হৈছে। ৰাজ্যিক সংবাদ সংস্থা ছিনহুয়াই বিষয়াসকলৰ উদ্ধৃতি দি কয় যে বেইজিঙৰ সময় অনুসৰি মাজনিশালৈকে ১২৬জন লোকৰ মৃত্যু হোৱা আৰু ১৮৮জন আহত হোৱা বুলি নিশ্চিত কৰা হৈছে। বিষয়াসকলে কয় যে উদ্ধাৰ অভিযানৰ গতি বৃদ্ধি পোৱাৰ লগে লগে মৃত্যুৰ সংখ্যা বৃদ্ধি পোৱাৰ সম্ভাৱনা আছে। চীনে নিজৰ মাউণ্ট এভাৰেষ্ট এলেকাৰ ওচৰৰ পৰ্যটনস্থলী বন্ধ কৰাৰ কথা ঘোষণা কৰাৰ বিপৰীতে অঞ্চলটোৰ কেইবাখনো ৰিজ’ৰ্টৰ পৰ্যটক আৰু কৰ্মচাৰী নিৰাপদ বুলি জানিব পৰা গৈছে। তিব্বতী মালভূমিক শক্তিশালী ভূমিকম্পপ্ৰৱণ অঞ্চল বুলি গণ্য কৰা হয়, কিয়নো ই টেকটনিক ইউৰেছিয়ান আৰু ভাৰতীয় প্লেটৰ মিলন আৰু প্ৰায়ে চৰম বলৰ সৈতে সংঘৰ্ষ হোৱা ঠাইত অৱস্থিত।