🔹 হলীউডত শোকৰ ছাঁ
নিউজ ডেস্ক, ১০ নৱেম্বৰ : ফাইনেল ডেষ্টিনেচন, কেণ্ডিমেনকে ধৰি কেইবাখনো হৰৰ ফিল্ম ফ্রেনচাইজীত দুর্দান্ত অভিনয়ৰ বাবে জনপ্রিয়তা লাভ কৰি চলচ্চিত্রপ্রেমীৰ হূদয়ত স্থান লাভ কৰা হলীউডৰ প্রখ্যাত অভিনেতা টনী ট’ডৰ লছ এঞ্জেলছস্থিত বাসগৃহত পৰলোকপ্রাপ্তি ঘটিছে৷ ৬৯ বছৰীয়া প্রখ্যাত অভিনেতাজনৰ বাসভৱনত মৃত্যু ঘটা বুলি পৰিয়ালৰ লোকে কালি আনুষ্ঠানিকভাৱে প্রকাশ কৰিছে৷ ১৯৫৪ চনৰ ৪ ডিচেম্বৰত ৱাশ্বিংটন ডিচিত জন্মগ্রহণ কৰা টনী ট’ডৰ মৃত্যুৰ কাৰণ এতিয়ালৈকে প্রকাশ কৰা হোৱা নাই৷ ১৯৯২ চনত কেণ্ডিমেনত অভিনয়েৰে নিউয়র্ক চিটীৰ হৰৰ ফিল্ম ফেষ্টিভেলত জীৱনজোৰা সাধনা বঁটা লাভ কৰা টনী ট’ডৰ জীৱনৰ উল্লেখযোগ্য ছবি ফাইনেল ডেষ্টিনেচন৷ চলচ্চিত্রৰ লগতে টিভি আৰু ভিডিঅ’ গেমছতো অভিনয় কৰা টনী ট’ডে ২১ জাম্প ষ্ট্রীট, নাইট ক’ড, মেকগাইভাৰ, মেকলক, জেক এণ্ড দ্য ফেট মেন, ল এণ্ড অর্ডাৰ, দ্য এক্স ফাইলছ, জেনা, বেভাৰলী হিল্ছ ৯০২১০, ৱাৰিয়ৰ প্রিন্সেছ এণ্ড মার্ডাৰকে ধৰি কেইবাখনো জনপ্রিয় ছবিত অভিনয় কৰিছিল৷ তদুপৰি স্লেছ, ডে অৱ দ্য ডেডতো অনবদ্য অভিনয়েৰে টনী ট’ডে অভিনয় জগতত নিজৰ নাম স্মৰণীয় কৰি ৰাখিছে৷