🔹 এআইৰ দ্বাৰা স্বপ্নৰ ভূখণ্ডৰ ছবি সৃষ্টি মার্কিন ৰাষ্ট্রপতিৰ
নিউজ ডেস্ক, ২৭ ফেব্রুৱাৰী : বতাহত বাৰুদৰ গোন্ধ৷ চাৰিওফালে ধ্বংসস্তূপ৷ আত্মীয়ক হেৰুওৱাৰ বিননি৷ হাস্পতালত পৰি আছে মৃতদেহ৷ এটুপি পানীৰ বাবে হাহাকাৰ কৰি ফুৰিবলগীয়া হৈছে শিশুসকলে৷ গাজাৰ এই ধ্বংসাত্মক ছবি দেখি বিষণ্ণ হৈ পৰিছে বিশ্ব৷ কিন্তু আমেৰিকাৰ ৰাষ্ট্রপতি ড’নাল্ড ট্রাম্পে গাজা দখল কৰি লোৱাৰ পিছত ইয়াৰ ছবি সম্পূর্ণ সলনি হৈ পৰিব৷ বতাহত উৰিব টকা৷ মায়াবিনী নিশা নামিব অভিশপ্ত গাজাত৷ এনে অদ্ভুত ছবি তথা ভিডিঅ’ ছ’চিয়েল মিডিয়াত মুকলি কৰি দিছে মার্কিন ৰাষ্ট্রপতি ট্রাম্পে৷ কৃত্রিম মেধা (এআই)ৰ জৰিয়তে ভয়াৱহ গাজাক এনে মায়া নগৰীলৈ সলনি কৰি দিছে ট্রাম্পে৷ মৃত মানুহক জীয়াই তোলা হৈছে৷ মৰুভূমিৰ বুকুত সৃষ্টি কৰা হৈছে মুষলধাৰ বৰষুণ৷ দ্বিতীয়বাৰ আমেৰিকাৰ ৰাষ্ট্রপতি হোৱাৰ পিছত গাজা দখল কৰি ল’ব বুলি ঘোষণা কৰিছে ট্রাম্পে৷ পেলেষ্টাইনী লোকসকলক অন্য স্থানলৈ প্রেৰণ কৰি গাজাক নতুন ৰূপত নির্মাণ কৰিব বুলি ঘোষণা কৰিছে মার্কিন ৰাষ্ট্রপতিগৰাকীয়ে৷ গতিকে গাজাত এআইৰ জৰিয়তে এনেদৰে সৃষ্টি কৰিছে ট্রাম্পে৷ লক্ষণীয়ভাৱে ট্রাম্পৰ এই স্বপ্ণৰ গাজাত এলন মাস্কে দুই হাতেৰে উৰুৱাইছে ধন৷ সাধাৰণ জনতাৰ মাজত দেখিবলৈ পোৱা গৈছে মাস্কক৷ ইফালে, মায়াপুৰী গাজাত সুউচ্চ ট্রাম্পৰ সোণৰ মূর্তি দেখিবলৈ পোৱা গৈছে৷ সমুদ্র তীৰত দেখিবলৈ পোৱা গৈছে ট্রাম্প আৰু ইজৰাইলৰ প্রধানমন্ত্রী নেতান্যেহুক৷ কিন্তু অসংখ্য শিশু–মহিলাৰ মৃত্যু হোৱা গাজাত এআইৰ সৃষ্ট এই ভিডিঅ’ত নাই শিশুসকল৷ ট্রাম্পৰ গাজাৰ পৰা যেন এআইৰ জৰিয়তেও নাইকিয়া কৰা হৈছে পেলেষ্টাইনীসকলক৷