নিয়মীয়া বাৰ্তা, ৫ অক্টোবৰঃ ক’ভিড–১৯ বা ক’ৰোনা ভাইৰাছ মহামাৰীত আক্রান্ত হৈ হাস্পতালত চিকিৎসাধীন হোৱা আমেৰিকাৰ ৰাষ্ট্রপতি ড’নাল্ড ট্রাম্পৰ স্বাস্থ্য সুস্থিৰ অৱস্থাত আছে৷ ৰাষ্ট্রপতিগৰাকীয়ে হাস্পতালত দ্বিতীয়টো নিশা কটোৱাৰ পূর্বে টুইটাৰত এক ভিডিঅ’ মুকলি কৰি দিছে৷ এই ভিডিঅ’ ত ৰাষ্ট্রপতিগৰাকীয়ে উল্লেখ কৰিছে যে আগন্তুক কেইটামান দিন তেওঁৰ বাবে হ’ব কঠিন পৰীক্ষা৷
লক্ষণীয়ভাৱে কালি ট্রাম্পৰ চিকিৎসা কৰা বিশেষজ্ঞ চিকিৎসক এগৰাকীয়ে ৰাষ্ট্রপতিগৰাকীৰ স্বাস্থ্যৰ উন্নতি ঘটা বুলি ঘোষণা কৰিছিল৷ অৱশ্যে ক’ভিডৰ পৰা ট্রাম্প সম্পূর্ণৰূপে মুক্ত হ’বলৈ কেইবাদিনো সময় লাগিব বুলি উল্লেখ কৰিছে চিকিৎসকগৰাকীয়ে৷