🔹 হিজবুল্লাৰ জ্যেষ্ঠ নেতাসহ পাঁচজন নিহত : বেইৰুটত প্রাসাদ ধ্বংস
নিউজ ডেস্ক, ৩ এপ্রিল : যুদ্ধবিৰতি উলংঘা কৰি এইবাৰ ইজৰাইলে আক্রমণ আৰম্ভ কৰিছে লেবাননৰ ৰাজধানী বেইৰুটত৷ গাজাৰ পাছত লেবানন হৈ পৰিছে ইজৰাইলী সেনাৰ আক্রমণৰ লক্ষ্য৷ প্রায় চাৰি মাহ ধৰি হিজবুল্লাৰ সৈতে চলি থকা যুদ্ধবিৰতি উলংঘা কৰি পৰহি লেবাননৰ ৰাজধানী চহৰখনত বোমা–ক্ষেপণাস্ত্রৰে আক্রমণ চলায় ইজৰাইলী সেনাই৷ লেবানন চৰকাৰে সদৰী কৰা অনুসৰি ইজৰাইলৰ এই আক্রমণৰ ফলত বহু মহলীয়া প্রাসাদ এটা বিধ্বস্ত হৈছে৷ এতিয়ালৈকে ধ্বংসস্তূপৰ পৰা পাঁচজনৰ মৃতদেহ উদ্ধাৰ কৰা হৈছে৷ ধ্বংসস্তূপৰ তলত বহু লোকৰ মৃতদেহ আবদ্ধ হৈ থকা বুলি আশংকা প্রকাশ কৰিছে প্রশাসনে৷ উল্লেখনীয় যে আক্রমণৰ ঘটনাত চিয়া মুছলমানৰ সশস্ত্র গোট হিজবুল্লাৰ শীর্ষস্থানীয় নেতা এগৰাকী নিহত হোৱা বুলি দাবী কৰিছে ইজৰাইলী সেনাই৷ ইফালে, হিজবুল্লাৰ এক সূত্রক উদ্ধৃত কৰি আল জাজিৰা সংবাদ মাধ্যমেও ইজৰাইলী সেনাৰ আক্রমণত হিজবুল্লাৰ জ্যেষ্ঠ নেতা এগৰাকী নিহত হোৱা বুলি প্রকাশ কৰা হৈছে৷ ইয়াৰ পূর্বে নৱেম্বৰৰ শেষ ভাগত হিজবুল্লাৰ বিৰুদ্ধে ক্ষেপণাস্ত্রৰে আঘাত হানিছিল ইজৰাইলী সেনাই৷ শেহতীয়াকৈ গাজাত আক্রমণ তীব্রতৰ কৰিছে ইজৰাইলে৷ এইবাৰ লেবাননতো আক্রমণ আৰম্ভ কৰিলে দেশখনৰ সেনাই৷