নিউজ ডেস্ক, ১৮ মাৰ্চঃ চন্দ্রৰ দক্ষিণ মেৰুত মহাকাশ যান মসৃণ অৱতৰণেৰে বিশ্বৰ প্রথম দেশ হিচাপে ভাৰতে ইতিহাস সৃষ্টি কৰাৰ পাছত চন্দ্রযান–৫ অভিযানৰ বাবে কেন্দ্রীয় চৰকাৰে অনুমোদন জনাইছে৷ ভাৰতীয় মহাকাশ গৱেষণা সংস্থা ইছৰোৰ চন্দ্রযান–৩ ইতিহাস সৃষ্টিকাৰী সফলতাৰ পাছত চন্দ্রযান–৫ত কেন্দ্রীয় চৰকাৰে অনুমোদন জনায়৷ ইছৰোৰ অধ্যক্ষ ভি নাৰায়ণনে প্রকাশ কৰা মতে চন্দ্রযান–৫ৰ জৰিয়তে চন্দ্রপৃষ্ঠলৈ ২৫০ কিলোগ্রাম ওজনৰ ৰ’ভাৰ প্রেৰণ কৰিব৷ অর্থাৎ ইতিহাস সৃষ্টিকাৰী চন্দ্রযান–৩ অভিযানৰ প্রজ্ঞানতকৈ ১০ গুণ ওজনৰ মহাকাশ যান চন্দ্রলৈ প্রেৰণ কৰিব৷ উল্লেখ্য যে চন্দ্রযান–৩ত প্রজ্ঞান যান ৰ’ভাৰখন ২৫ কিলোগ্রাম ওজনৰ আছিল৷ চন্দ্রযান–৫ত এই যানখনৰ ওজন হ’ব ২৫০ কিলোগ্রাম৷ জাপানৰ সৈতে এই অভিযান চলাব ইছৰোৱে৷ ইছৰোৰ অধ্যক্ষ নাৰায়ণনে প্রকাশ কৰা মতে চন্দ্রপৃষ্ঠৰ গভীৰ অধ্যয়ন আৰু বিশ্লেষণ কৰাৰ বাবেই পূর্বতকৈ অধিক অত্যাধুনিক ৰ’ভাৰ প্রেৰণ কৰা হ’ব৷ তিনি দিন পূর্বেই কেন্দ্রীয় চৰকাৰে চন্দ্রযান–৫ অভিযানত অনুমোদন জনাইছে৷ জাপানৰ মহাকাশ প্রযুক্তিৰ সহযোগ লৈ এই অভিযান চলাব৷ দুয়োখন দেশৰ মহাকাশ প্রযুক্তিৰ সক্ষমতাই এই অভিযানত আন এক ইতিহাস গঢ়াৰ সম্ভাৱনা আছে৷ উল্লেখ্য যে ২০০৮ চনত চন্দ্রযান–১ অভিযান আৰম্ভ হৈছিল আৰু এই অভিযান সফল হৈছিল৷ ইয়াৰ পাছৰে পৰা চন্দ্রৰ গভীৰ ৰহস্য উদ্ঘাটন কৰিবলৈ ইছৰোৱে চন্দ্রযান অভিযানৰ ছিৰিজ চলাই আছে৷ ইপিনে, চন্দ্রযান–৪ অভিযান ২০২৭ চনৰ শেষৰফালে উৎক্ষেপণ কৰা হ’ব৷ এই অভিযানৰ লক্ষ্য হৈছে চন্দ্রপৃষ্ঠৰ পৰা নমুনা সংগ্রহ কৰি পৃথিৱীলৈ উভতি অহা৷ ইয়াৰ পাছতে চন্দ্রযান–৫ আৰু চন্দ্রযান–৬ অভিযান আৰম্ভ হ’ব৷