🔹 গাব্বাত দ্বৈত ভূমিকাত অৱতীর্ণ হ’ব ভাৰতীয় পেচাৰ !
নিউজ ডেস্ক, ১৩ ডিচেম্বৰ : এডিলেইড টেষ্টত ১০ উইকেটত পৰাজিত হৈছে টীম ইণ্ডিয়া৷ বুমৰাহৰ বাহিৰে আন কোনো ভাৰতীয় বলাৰে বিশেষ প্রভাৱ পেলাবলৈ সক্ষম হোৱা নাই৷ ইয়াৰ মাজতে ভাৰতীয় অনুৰাগীৰ মাজত উদ্বেগৰ সৃষ্টি কৰে বুমৰাহৰ আঘাতে৷ দ্বিতীয় ইনিংছত তেওঁক ফিজিঅ’ থেৰাপিষ্টে পৰিচর্যাও কৰা দেখা গৈছিল৷ আনকি, এডিলেইড টেষ্টত পৰাজয়ৰ পিছত ভাৰতৰ অনুশীলনতো নমা নাছিল তেওঁ৷ অৱশেষত সকলো আশংকা দূৰ কৰি উভতি আহিছে বুমৰাহ৷ ব্রীজবেনৰ অনুশীলনত আন ৰূপত ধৰা দিয়ে পেচ বলাৰগৰাকী৷ উইকেটৰ একেবাৰে ওচৰলৈ আহি লেগ স্পিনৰ যাদুৰে মুগ্ধ কৰে সকলোকে৷ ছ’চিয়েল মিডিয়াত ভাইৰেল হৈছে তেওঁৰ স্পিন বলিঙৰ ভিডিঅ’৷ অৱশ্যে সেয়া বেছি সময়ৰ বাবে নহয়৷ তাৰ পিছতে তেওঁ ৰাহুল আৰু যশস্বী জয়ছোৱালৰ বিৰুদ্ধে পেচ বলিং কৰে৷ এতিয়া সকলোৰে ধাৰণা হৈছে- গাব্বা টেষ্টত বুমৰাহ দ্বৈত ভূমিকাত অৱতীর্ণ হ’ব পাৰে!