নিউজ ডেস্ক, ৫ এপ্ৰিলঃ তেওঁক ‘বাইশ গজৰ সব্যসাচী’ বুলি ক’লেও ভুল নহ’ব৷ দুয়োখন হাতেৰে সমানে পাকৈত৷ ইডেন গার্ডেনত দুয়োখন হাতেৰে বলিং কৰি আইপিএলৰ ইতিহাসত প্রথমজন খেলুৱৈ হিচাপে নজিৰ গঢ়িলে শ্রীলংকাৰ কামিণ্ডু মেণ্ডিছে৷ বৃহস্পতিবাৰে ছানৰাইজার্ছ হায়দৰাবাদৰ হৈ আইপিএলত অভিষেক ঘটে কামিণ্ডুৰ৷ আইপিএলৰ ইতিহাসত প্রথম দুহতীয়া বলাৰ হিচাপে তেওঁ অভিলেখ গঢ়ে৷ ইয়াৰ পূর্বে কোনো বলাৰক দুয়ো হাতেৰে বলিং কৰা দেখা পোৱা নাই৷ মেচখনত তেওঁ এটা উইকেট দখল কৰে৷ ইয়াৰ পূর্বেও তেওঁ সদায় দুয়ো হাতেৰে বল কৰি আহিছিল৷ এইবাৰ আইপিএলৰ মঞ্চতো তেওঁ ‘ইউনিভার্র্ছেল বলাৰ’ হিচাপে লাইমলাইটলৈ আহে৷ অৱশ্যে মেচখনত তেওঁ মাত্র এটা অভাৰহে বলিং কৰিছিল৷ যোৱা বছৰৰ জুলাইত ভাৰত আৰু শ্রীলংকাৰ মাজত অনুষ্ঠিত টি–২০ মেচতো কামিণ্ডুৱে দুয়ো হাতেৰে বলিং কৰিছিল৷ সূর্যকুমাৰ যাদৱক বাঁওহাত আৰু ৰিংকু সিঙক সোঁহাতেৰে বলিং কৰা দেখা গৈছিল৷ বৃহস্পতিবাৰে ইডেনত তেওঁৰ প্রথম, তৃতীয় আৰু চতুর্থ ডেলিভাৰী বাঁওহাতৰ৷ বাকী তিনিটা ডেলিভাৰী সোঁহাতৰ৷ এতিয়া প্রশ্ন হয়, এজন বলাৰ দুয়ো হাতেৰে বল কৰিব পাৰিবনে? আইচিচিৰ নিয়ম মতে বলাৰ এজনে দুয়ো হাতেৰে বল কৰিব পাৰে৷ তেনে ক্ষেত্রত তেওঁ প্রথমে আম্পায়াৰক অৱগত কৰিব লাগিব৷ একে সময়তে ষ্ট্রাইকিং এণ্ডত থকা বেটাৰেও এই বিষয়ে সচেতন হ’ব লাগিব৷ যদি তেওঁ আম্পায়াৰক অৱগত নকৰাকৈ আন এখন হাতেৰে বল কৰে, তেন্তে সেয়া ন’ বল গণ্য কৰা হ’ব৷