🔹 নতুন জীৱনীত প্রকাশ পাব মাস্কৰ প্রাক্তন প্রেমিকাৰ সৈতে সম্পর্কৰ গভীৰতাৰ কথা
বিশেষ বাৰ্তা, ১০ ছেপ্টেম্বৰ : দুই নহয়, প্রাক্তন প্রেমিকাৰ সৈতে তৃতীয় সন্তানো আছে ধনকুবেৰ এলন মাস্কৰ৷ নতুন জীৱনীত এই বিস্ফোৰক তথ্য পোহৰলৈ আহিছে৷ আগন্তুক ১২ ছেপ্টেম্বৰত প্রকাশ পাব মাস্কৰ এই নতুন জীৱনী৷ এক বিদেশী সংবাদ মাধ্যমৰ খবৰ অনুসৰি এই জীৱনীত প্রকাশ পাব মাস্কৰ প্রাক্তন প্রেমিকাৰ সৈতে সম্পর্কৰ গভীৰতাৰ কথা৷ ইমানদিনে জনা গৈছে যে মিছ গ্রাইমছৰ সৈতে দুই সন্তানৰ পিতৃ হৈছিল এলন মাস্ক৷ কিন্তু এই নতুন জীৱনীত উল্লেখ কৰা হৈছে তৃতীয় সন্তানৰ কথাও৷ এই তৃতীয় সন্তানৰ নাম টেকনো মেকানিকাছ৷ টাও বুলিও মতা হয় মাস্কৰ তৃতীয় সন্তানক৷ অৱশ্যে মাস্কৰ তৃতীয় সন্তানৰ জন্ম কোন চনত হৈছিল, সেই কথা উল্লেখ কৰা হোৱা নাই নতুন জীৱনীত৷ তৃতীয় সন্তানৰ পৰিচয় কার্যতঃ গোপনে ৰখা হৈছে৷ কিন্তু এই সন্তানৰ কথা মাস্কে কিয় গোপন কৰিছিল সেই কথা জানিব পৰা হোৱা নাই৷ টাওৰ কথা পোহৰলৈ অহাৰ লগে লগে এয়া স্পষ্ট হৈ পৰিল যে তিনি মহিলাৰ সৈতে থকা সম্পর্কৰ জৰিয়তে ১০ সন্তানৰ পিতৃ এলন মাস্ক৷ ২০১৮ৰ পৰা ২০২২ চনৰ ভিতৰত কানাডিয়ান ইলেক্ট্র’–মিউজিক তাৰকা ক্লেয়াৰ বাউচাৰৰ সৈতে সম্পর্ক গঢ়ি তুলিছিল মাস্কে৷ ২০২০ চনত জন্ম হোৱা তেওঁলোকৰ প্রথম সন্তানৰ নাম আছিল এক্স৷ পৰৱর্তী বছৰত কন্যা সন্তানৰ পিতৃ হয় মাস্ক৷ এই সন্তানটিৰ নাম ৰখা এক্সা৷ শেহতীয়াকৈ পুনৰ মাস্ক আৰু মিছ জিলিচৰ যমজ সন্তানৰ ছবি প’ষ্ট কৰিছিল মাস্কে৷ ইয়াৰ উপৰি প্রাক্তন পত্নী কানাডিয়ান লেখিকা জাষ্টিন উইলচনৰ সৈতে মাস্কৰ আছিল ছয় সন্তান৷ অৱশ্যে ২০০২ চনত তেওঁলোকৰ প্রথম সন্তানটোৰ মৃত্যু হয়৷ নতুন জীৱনী প্রকাশ পালে মাস্কৰ বহু অজানা তথ্য পোহৰলৈ আহিব বুলি ইতিমধ্যে বিষয়টোক লৈ সংবাদ মাধ্যমত চর্চা চলিছে৷ ধনকুবেৰ মাস্কৰ বহু গোপন কাহিনী এই জীৱনীয়ে উন্মোচন কৰাৰ সম্ভাৱনা আছে৷