🔹 ১০ কোটিৰো বেছি প্রধানমন্ত্রীৰ ফ’লোৱাৰৰ সংখ্যা
বিশেষ বাৰ্তা, ২১ জুলাই : ছ’চিয়েল মিডিয়াত এই মুহূর্তত বিশ্বৰ ৰাষ্ট্রনেতাসকলৰ ভিতৰত আটাইতকৈ বেছি ফ’লোৱাৰ আছে প্রধানমন্ত্রী নৰেন্দ্র মোদীৰ৷ ‘এক্স’ হেণ্ডেলত মোদীৰ ফ’লোৱাৰৰ সংখ্যাই ১০ কোটি অতিক্রম কৰিছে৷ গতিকে প্রধানমন্ত্রী মোদীক শুভেচ্ছা জনালে ‘এক্স’ৰ মালিক ধনকুবেৰ এলন মাস্কে৷ মাস্কে নিজৰ ‘এক্স’ হেণ্ডেলত লিখিছে– ‘আটাইতকৈ বেছি অনুসৰণ কৰা বিশ্বনেতা হোৱা বাবে অভিনন্দন প্রধানমন্ত্রী মোদী৷’ মোদীয়েও মাস্কৰ পোষ্টৰ উত্তৰ দিছে৷ প্রধানমন্ত্রীগৰাকীয়ে ইয়াৰ উত্তৰত লিখিছে– ‘এক্সত এশ নিযুত এই মাধ্যমত থাকিবলৈ পাই তথা আলোচনা, বিতর্ক, অন্তর্দৃষ্টি, জনগণৰ আশীর্বাদ, গঠনমূলক সমালোচনা আৰু বহু কৰিবলৈ পাই সুখী৷’ অৱশ্যে আমেৰিকাৰ প্রাক্তন ৰাষ্ট্রপতি বাৰাক অ’বামা এতিয়াও মোদীতকৈ আগত আছে৷ অ’বামাৰ ফ’লোৱাৰৰ সংখ্যা ১৩১ নিযুত৷ অর্থাৎ ১৩ কোটিতকৈও বেছি৷ কিন্তু যিহেতু এই মুহূর্তত অ’বামা ৰাষ্ট্রনেতা নহয়, গতিকে তালিকাৰ শীর্ষত মোদীকেই ধৰা হৈছে৷ বিশ্বৰ ৰাজনীতিবিদসকলৰ তালিকাত ইয়াৰ পিছত আছে ড’নাল্ড ট্রাম্প৷ ট্রাম্পৰ ফ’লোৱাৰৰ সংখ্যা ৮ কোটি ৭০ লাখ৷