নিয়মীয়া বাৰ্তা ডিজিটেল, ২১ নৱেম্বৰঃ ব্রাজিলত জি–২০ সন্মিলনত অংশ লৈ ঐতিহাসিক গায়েনা ভ্রমণ আৰম্ভ কৰিলে প্রধানমন্ত্রী নৰেন্দ্র মোদীয়ে৷ ৫০ বছৰতকৈও অধিক সময়ৰ পাছত ভাৰতীয় প্রধানমন্ত্রী হিচাপে নৰেন্দ্র মোদী জর্জটাউনত উপস্থিত হয়৷ জর্জটাউনত উপস্থিত হোৱাৰ পাছতে ভাৰতীয় প্রধানমন্ত্রী মোদীক প্রবাসী ভাৰতীয়সকলে উষ্ম আদৰণি জনায়৷ ১৮০ বছৰ পূর্বে ভাৰতৰ পৰা প্রব্রজিত নাগৰিকসকলে গায়েনাত বিভিন্ন ক্ষেত্রত প্রতিষ্ঠা কৰিবলৈ সক্ষম হৈ ভাৰতীয় সংস্কৃতি বর্তাই ৰাখিছে৷ এই প্রবাসী ভাৰতীয়সকলে প্রধানমন্ত্রী মোদীক ভাৰতীয় পৰম্পৰাৰে আদৰণি জনায়৷ জর্জটাউনৰ হোটেলত উপস্থিত হোৱা প্রধানমন্ত্রী মোদীক গায়েনাৰ ৰাষ্ট্রপতি আৰু প্রধানমন্ত্রীয়ে বিশেষভাৱে আদৰণি জনায়৷ ইয়াৰ উপৰি বার্বাডোজৰ প্রধানমন্ত্রীয়েও মোদীক আদৰণি জনায়৷ ইপিনে ভাৰত–গায়েনাৰ ঐতিহাসিক সম্পর্কৰ স্বীকৃতি হিচাপে জর্জটাউনৰ মেয়ৰে প্রধানমন্ত্রী মোদীক অর্পণ কৰে ‘কী টু দ্য চিটী অৱ জর্জটাউন’৷ পৃথিৱীৰ ভিতৰত অন্যতম পুৰণি প্রবাসী ভাৰতীয়ৰ বাসভূমি গায়েনাত প্রধানমন্ত্রী মোদীয়ে ভাৰতীয় মূলৰ লোকসকলৰ সৈতে অন্তৰংগ আলাপত মিলিত হয়৷ ভাৰতীয় পতাকা হাতত লৈ পৰম্পৰাগত সাজ–পোছাক পৰিহিত লোকসকলে প্রধানমন্ত্রী মোদীক আদৰণি জনোৱাৰ সময়ত উৎসাহ প্রদর্শন কৰে৷ ভাৰতীয় সম্প্রদায়ৰ এজন সদস্যই মোদী মোদী ধ্বনি দি তেওঁৰ দ্বাৰা অংকিত মোদীৰ স্কেচ্চ এখনো প্রধানমন্ত্রীক অর্পণ কৰে৷ গায়েনাৰ জর্জটাউনত উপস্থিত হোৱা প্রধানমন্ত্রী মোদীক বিমানবন্দৰত অভাৱনীয়ভাৱে দেশখনৰ ৰাষ্ট্রপতি ইৰফান আলীয়ে আদৰণি জনায়৷ গায়েনা ভ্রমণৰ সময়তে প্রধানমন্ত্রী মোদীক দেশখনৰ চৰকাৰে সর্বোচ্চ অসামৰিক সন্মানেৰে বিভূষিত কৰা হ’ব বুলিও আনুষ্ঠানিকভাৱে প্রকাশ কৰে৷ গায়েনাৰ উপৰি বার্বাডোজে তেওঁলোকৰ দেশখনৰ সর্বোচ্চ অসামৰিক সন্মান আগবঢ়াব প্রধানমন্ত্রী মোদীক৷ ডমিনিকাৰ সর্বোচ্চ সন্মান আগবঢ়োৱাৰ পাছত প্রধানমন্ত্রী মোদীলৈ গায়েনাৰ সর্বোচ্চ সন্মান ‘দ্য অর্ডাৰ অৱ এক্সিলেঞ্চ’ আৰু বার্বাডোজৰ ‘অনাৰী অর্ডাৰ অৱ ফ্রীডম অৱ বার্বাডোজ’ মোদীক আনুষ্ঠানিকভাৱে প্রদান কৰে৷ নাইজেৰিয়া আৰু ব্রাজিল ভ্রমণৰ পাছত গায়েনাত উপস্থিত হোৱা মোদীয়ে পাঁচদিনীয়া ভ্রমণসূচী সামৰি নতুন দিল্লীলৈ উভতি আহিব৷