🔴 ভাৰতীয় মহাকাশ গৱেষণা সংস্থাৰ প্রতিনিধিসকলক সাক্ষাৎ কৰিবলৈও আগ্রহী সুনীতা
📌প্রধানমন্ত্রীয়ে পৃথিৱীলৈ প্রত্যাৱর্তনৰ দিনাই আমন্ত্রণ জনাইছিল ভাৰতীয় বংশোদ্ভৱ সুনীতাক
নিউজ ডেস্ক, ২ এপ্রিলঃ ভাৰতলৈ আহিব মার্কিন মহাকাশচাৰী সুনীতা উইলিয়ামছ৷ ২৭৮ দিন মহাকাশত আবদ্ধ হৈ থাকি নিৰাপদে পৃথিৱীলৈ উভতি অহাৰ সময়তে ভাৰতীয় বংশোদ্ভৱ মার্কিন মহাকাশচাৰী সুনীতা উইলিয়ামছক ভাৰতলৈ আমন্ত্রণ জনাইছিল প্রধানমন্ত্রী নৰেন্দ্র মোদীয়ে৷ নিৰাপদে স্পেচএক্সৰ ড্রেগন কেপছুলেৰে আমেৰিকা যুক্তৰাষ্ট্রৰ ফ্ল’ৰিডাৰ আটলাণ্টিক মহাসাগৰত অৱতৰণ কৰাৰ পাছত সুনীতা উইলিয়ামছক ৪৫ দিনৰ পুনৰ সংস্থাপনত ৰখা হৈছে৷ ইয়াৰ পাছতেই ৰাজহুৱা জীৱন আৰম্ভ কৰিব উইলিয়ামছে৷ ৰাজহুৱা জীৱন আৰম্ভ কৰি উইলিয়ামছে ভাৰতলৈ অহাৰ আগ্রহ প্রকাশ কৰিছে৷ নিজেই এই আগ্রহ প্রকাশ কৰি মহাকাশচাৰী উইলিয়ামছে ভাৰত ভ্রমণৰ সময়ত ভাৰতীয় মহাকাশ গৱেষণা সংস্থা ইছৰোৰ সৈতেও বার্তালাপত মিলিত হ’ব বুলি প্রকাশ কৰিছে৷ উল্লেখ্য যে গুজৰাটৰ দীপক পাণ্ডা আৰু উৰচুলিন বনিপাণ্ডাৰ শ্লোভাক আমেৰিকান সুনীতা উইলিয়ামছ পিতৃসূত্রে ভাৰতীয় বংশোদ্ভৱ৷ ভাৰতীয় বংশোদ্ভৱ দ্বিতীয় মহাকাশচাৰী সুনীতা উইলিয়ামছৰ বর্তমান নাছাৰ চিকিৎসা কেন্দ্রত স্বাস্থ্যৰ পৰীক্ষা–নিৰীক্ষা চলাই থকা হৈছে৷ মঙলবাৰে প্রথমবাৰৰ বাবে উইলিয়ামছ সংবাদ মাধ্যমৰ সন্মুখীন হৈ ভাৰতলৈ অহাৰ আগ্রহ প্রকাশ কৰিছে৷ সংবাদ মাধ্যমৰ আগত উইলিয়ামছে কয়– মোৰ আশা আৰু মই নিশ্চিতভাৱে মোৰ পিতৃৰ দেশলৈ গৈ তাৰেই ব্যক্তিসকলৰ সৈতে সাক্ষাৎ হ’ম৷ ভাৰতৰ মহাকাশ গৱেষণা সংস্থাৰ বিজ্ঞানী বিশেষজ্ঞৰ সৈতেও মিলিত হ’ম৷ মন কৰিবলগীয়া যে ২০২৪ চনৰ ৫ জুনত ৮ দিনৰ বাবে মহাকাশলৈ গৈ ষ্টাৰলাইনাৰ মহাকাশ যানৰ কাৰিকৰী বিজুতি ঘটাৰ বাবে ২৭৮ দিন আন্তর্জাতিক মহাকাশ কেন্দ্রত আবদ্ধ হৈ থাকে৷ যোৱা ১৯ মার্চত পৃথিৱীলৈ নিৰাপদে উভতি আহে স্পেচএক্সৰ ড্রেগন কেপছুলেৰে৷