🔹 ধ্বংসস্তূপৰ পৰা ১২০ ঘণ্টা পাছত জীৱন্তে উদ্ধাৰ যুৱকক
নিউজ ডেস্ক, ৩ এপ্রিল : ভূমিকম্পত ম্যানমাৰৰ অসংখ্য বাসগৃহ বিধ্বস্ত হৈছে৷ ইতিমধ্যে এই বিধ্বংসী ভূমিকম্পত দেশখনত প্রাণ হেৰুওৱা লোকৰ সংখ্যাই অতিক্রম কৰিছে ২৭০০৷ উদ্ধাৰকার্য যিমানে আগবাঢ়িছে সিমানে মৃতকৰ সংখ্যা বৃদ্ধি পাইছে৷ আশংকা কৰা হৈছে- এতিয়াও ধ্বংসস্তূপৰ তলত আবদ্ধ হৈ আছে শ শ লোক৷ এইবাৰ ভূমিকম্প-বিধ্বস্ত দেশখনৰ এখন হোটেলৰ ধ্বংসস্তূপৰ পৰা জীৱিত অৱস্থাত উদ্ধাৰ হৈছে এজন যুৱক৷ ১২০ ঘণ্টাৰো বেছি সময় ধৰি ধ্বংসস্তূপৰ তলত আবদ্ধ হৈ আছিল এই যুৱকজন৷ ৰাজধানী নেইপিটাওৰ এখন হোটেলত ধ্বংসস্তূপৰ পৰা কালি উদ্ধাৰকাৰীয়ে মুমূর্ষু অৱস্থাত যুৱকজনক উদ্ধাৰ কৰে৷ সংবাদ সংস্থাৰ প্রতিবেদন অনুসৰি যোৱা শুকুৰবাৰে বিধ্বংসী ভূমিকম্পত ধ্বংস হৈছিল হোটেলখন৷ পাঁচদিন পিছত কালি পুৱা সেই ধ্বংসাৱশেষৰ পৰা উদ্ধাৰ কৰা হৈছে ২৬ বছৰ বয়সীয়া যুৱকজনক৷ বর্তমান হাস্পতালত চিকিৎসাধীন হৈ আছে যুৱকজন৷ স্মর্তব্য যে ৭.৭ প্রাবল্যৰ ভূমিকম্পই ম্যানমাৰ আৰু থাইলেণ্ডৰ বিস্তীর্ণ অঞ্চল ধ্বংসস্তূপত পৰিণত কৰাৰ পিছত এতিয়ালৈকে ১৫টা আফটাৰ শ্বক অনুভূত হৈছে ম্যানমাৰত৷