নিয়মীয়া বাৰ্তা ৩০ ডিচেম্বৰঃ ক’ভিড–১৯ মহামাৰীৰ তৃতীয় জোৱাৰৰ পৰা পৰিত্রাণ পাবলৈ হ’লে ইউৰোপীয় দেশ ব্রিটেইনে এটা সপ্তাহৰ ভিতৰত দেশখনৰ দুই নিযুত লোকক ক’ভিড ভেকচিন প্রদান কৰিব লাগিব৷ লণ্ডন স্কুল অৱ হাইজিন এণ্ড ট্র’পিকেল মেডিচিনৰ (এলএছএইচডিএম) তৰফৰ পৰা চলোৱা এক অধ্যয়নত সদৰী হৈছে এই তথ্য৷
সংবাদ সংস্থা ৰয়টাৰৰ প্রতিবেদন অনুসৰি ক’ভিড–১৯ত ব্রিটেইনত ২.৩ নিযুততকৈ অধিক লোক আক্রান্ত হৈছে৷ দেশখনত এতিয়ালৈকে মহামাৰীত প্রাণ হেৰুৱাইছে ৭১ সহস্রাধিক লোকে৷ স্মর্তব্য যে ক’ভিড–১৯ৰ পৰিৱর্তিত প্রকাৰণে ৭০ গুণ অধিক ক্ষিপ্রতাৰে ব্রিটেইনত সংক্রমণ ঘটোৱাৰ লগে লগে দেশখনত আগন্তুক জানুৱাৰী মাহলৈকে বিদ্যালয়সমূহ বন্ধ ঘোষণা কৰাৰ চিন্তা–চর্চা চলোৱা হৈছে৷ যদি দ্রুতগতিত দেশখনত ক’ভিডৰ গণ টিকাকৰণ সম্ভৱ হৈ নুঠে, তেন্তে আগন্তুক জানুৱাৰী মাহত দেশখনত বহু লোকে প্রাণ হেৰুওৱাৰ আশংকা আছে৷ সংস্থাটোৰ সমীক্ষা অনুসৰি ক’ভিডৰ গণ টিকাকৰণ বর্তমানতকৈ দুগুণ হাৰত চলিব লাগিব দেশখনত৷