ৰাষ্ট্রসংঘৰ প্রতিবেদনত চাঞ্চল্যকৰ তথ্যঃ এহাজাৰ বৃহৎ বান্ধে ভাৰতলৈ কঢ়িয়াব বিপর্যয়
নিয়মীয়া বাৰ্তা ২৫ জানুৱাৰীঃ ভাৰত–আমেৰিকা তথা অন্যান্য বিভিন্ন দেশত থকা পুৰণি নদীবান্ধসমূহে বৃহৎ বিপর্যয় কঢ়িয়াই আনিব পাৰে৷ ৰাষ্ট্রসংঘৰ এক প্রতিবেদনত সদৰী হৈছে এই তথ্য৷ ৰাষ্ট্রসংঘৰ বিশ্ববিদ্যালয়ৰ কানাডাস্থিত জল, পৰিৱেশ আৰু স্বাস্থ্য প্রতিষ্ঠানে চলোৱা সমীক্ষা অনুসৰি বিশ্বজুৰি ৫৮,৭০০ বৃহৎ বান্ধ আছে, যিবোৰ নির্মাণ কৰা হৈছে ১৯৩০ৰ পৰা ১৯৭০ চনৰ ভিতৰত৷ এই বান্ধসমূহৰ ম্যাদ সাধাৰণতে ৫০ৰ পৰা ১০০ বছৰ হ’ব পাৰে৷ ভাৰতত এহাজাৰতকৈ অধিক বৃহৎ বান্ধৰ নির্মাণকার্যৰ ৫০ বছৰ সম্পূর্ণ হ’ব ২০২৫ চনৰ ভিতৰত৷ এই বান্ধসমূহে দেশখনৰ বাবে বৃহৎ বিপর্যয় কঢ়িয়াই আনিব পাৰে৷
ৰাষ্ট্রসংঘৰ প্রতিবেদন অনুসৰি ২০৫০ৰ ভিতৰত বিশ্বৰ বিভিন্ন দেশ পুৰণি নদীবান্ধসমূহৰ বাবে সংকটৰ সন্মুখীন হ’ব৷ ‘এজিং ৱাটাৰ ইনফ্রাষ্ট্রাকচাৰ ঃ এন এমার্জিং গ্ল’বেল ৰিস্ক’ শীর্ষক প্রতিবেদনত এই কথাও উল্লেখ কৰা হৈছে যে আগন্তুক তিনিটা দশকৰ ভিতৰত পৃথিৱীৰ গৰিষ্ঠসংখ্যক লোকে বাস কৰিব বিংশ শতিকাত নির্মাণ কৰা বান্ধসমূহৰ নামনি অঞ্চলত৷ গতিকে ভয়াৱহ পৰিস্থিতিৰ সন্মুখীন হ’ব জনসাধাৰণ৷ স্মর্তব্য যে পুৰণি বহু বান্ধ ভাঙি পৰাৰ ফলত ইতিমধ্যে বিশ্বৰ বিভিন্ন প্রান্তত নামনি অঞ্চলৰ বাসিন্দাসকল সমস্যাৰ সন্মুখীন হ’বলগীয়া হৈছে৷ এনে ঘটনাত বহু লোকে প্রাণো হেৰুৱাইছে পৃথিৱীত৷
ৰাষ্ট্রসংঘৰ এই প্রতিবেদন অনুসৰি আমেৰিকা, ফ্রান্স, কানাডা, ভাৰত, জাপান, জাম্বিয়া আৰু জিম্বাব’ৱেৰ বহু পুৰণি বান্ধৰ ওপৰত বিশ্লেষণ চলোৱা হৈছে৷ বিশ্বৰ ৩২,৭১৪টা অর্থাৎ ৫৫ শতাংশ বৃহৎ বান্ধ আছে এছিয়াৰ চাৰিখন দেশত৷ এই চাৰিখন দেশ হৈছে চীন, ভাৰত, জাপান আৰু দক্ষিণ কোৰিয়া৷ চাৰিওখন দেশৰ বৃহৎ বান্ধবোৰৰ নির্মাণৰ সময় আগন্তুক ৫ বছৰৰ ভিতৰত ৫০ বছৰ উকলিব৷