🔹বিশ্বজুৰি বাণিজ্যিক যুদ্ধ সূত্রপাতৰ আশংকা
নিউজ ডেস্ক, ৪ এপ্রিল : আমেৰিকা যুক্তৰাষ্ট্রৰ ‘মুক্তি দিৱস’ত আমদানি শুল্ক ঘোষণা ৰাষ্ট্রপতি ড’নাল্ড ট্রাম্পৰ৷ ৰাষ্ট্রপতি ট্রাম্পৰ শুল্ক নীতিক লৈ অসন্তুষ্ট বিশ্ব৷ ট্রাম্পৰ এই ঘোষণাত বিশ্বজুৰি বাণিজ্যিক যুদ্ধৰ সূত্রপাতৰ আশংকা ঘনীভূত হৈছে৷ নতুনকৈ বলৱৎ কৰা ট্রাম্পৰ শুল্ক নীতিৰ বিৰুদ্ধে বিশ্বৰ বিভিন্ন দেশে যুঁজ দিয়াৰ হুংকাৰ দিছে৷ ক্ষুব্ধ হৈ পৰিছে ইউৰোপীয় ইউনিয়ন৷ ৰাষ্ট্রপতি ট্রাম্পক প্রত্যাহ্বান জনাই চীন আৰু কানাডাই আমেৰিকাৰ ওপৰতো আৰোপ কৰিব অতিৰিক্ত শুল্ক৷ ইপিনে, ট্রাম্পৰ শুল্ক ব্যৱস্থাই ভাৰতৰ অর্থনীতিত ধাৰণা কৰাৰ বিপৰীতে মধ্যমীয়া প্রভাৱ পেলাব বুলি ঘোষণা কৰিছে বাণিজ্য মন্ত্রণালয়ে৷ মার্কিন ৰাষ্ট্রপতি ট্রাম্পে বিশ্বৰ প্রতিখন দেশৰ ওপৰত নতুন শুল্ক নীতি আৰোপ কৰাৰ পিছতেই তীব্র প্রতিক্রিয়াৰ সৃষ্টি হৈছে৷ ৰাষ্ট্রপতি ট্রাম্পে ‘মুক্তি দিৱস’ হিচাপে ইতিপূর্বে ঘোষণা কৰি কালিৰ দিনটোতেই নতুন শুল্ক কৰ আৰোপ কৰা সন্দর্ভত কয়– যদি কোনো দেশে আমেৰিকাৰ প্রতি সুৰ নৰম কৰে, তেতিয়াহ’লে সেই দেশৰ ওপৰত আৰোপ কৰা পাৰস্পৰিক শুল্ক হ্রাস কৰাৰ বিবেচনা হ’ব৷ ইয়াৰ পৰিৱর্তে যদি কোনো দেশে আমেৰিকাৰ পণ্যৰ ওপৰত অতিৰিক্ত শুল্ক আৰোপ কৰে, তেতিয়াহ’লে সেই দেশৰ ওপৰত কঠোৰ হ’ব আমেৰিকা৷ ৰাষ্ট্রপতি ট্রাম্পে ঘোষণা কৰা নতুন আমদানি শুল্ক ভাৰতৰ ওপৰত ২৬ শতাংশ, চীনৰ ওপৰত ৩৪ শতাংশ, ইউৰোপীয় ইউনিয়নৰ ওপৰত ২০ শতাংশ, ভিয়েটনাম ৪৬ শতাংশ, জাপান ২৪ শতাংশ, দক্ষিণ কোৰিয়া ২৫ শতাংশ, থাইলেণ্ড ৩৬ শতাংশ, ছুইজাৰলেণ্ড ৩১ শতাংশ, ভূটান ১০ শতাংশ, পাকিস্তান ২৯ শতাংশ, নিউজিলেণ্ড ১০ শতাংশ, নেপাল ১০ শতাংশ, আফগানিস্তান ১০ শতাংশ, বাংলাদেশ ৩৭ শতাংশ, ব্রাজিল ১০ শতাংশ, শ্রীলংকাত ৪৪ শতাংশ আৰোপ কৰা হৈছে৷ বাকী দেশসমূহতো ৰাষ্ট্রপতি ট্রাম্পে নতুন আমদানি শুল্ক আৰোপ কৰিছে৷ ৰাষ্ট্রপতি ট্রাম্পৰ এই শুল্ক নীতিক লৈ তীব্র প্রতিক্রিয়া ব্যক্ত কৰিছে বিশ্বৰ বিভিন্ন দেশে৷ অষ্ট্রেলিয়াই আমেৰিকাৰ ওপৰতো অতিৰিক্ত কৰ আৰোপৰ হুংকাৰ দিছে৷ ঠিক তেনেদৰে ইউৰোপীয় সংঘয়ো ট্রাম্পৰ শুল্ক নীতিৰ বিৰুদ্ধে ক্ষোভ প্রকাশ কৰি ইয়াৰ বিৰুদ্ধে যুঁজাৰ হুংকাৰ দিছে৷ ট্রাম্পৰ শুল্ক নীতিৰ বিৰুদ্ধে যুঁজ দিবলৈ কানাডা সাজু হৈছে বুলি প্রধানমন্ত্রী মার্ক কার্নেই ঘোষণা কৰিছে৷ আমেৰিকাৰ এই নতুন শুল্ক নীতিৰ ফলত কানাডাবাসীৰ ওপৰত বিৰূপ প্রভাৱ পৰিব৷ ইয়াৰ পৰিপ্রেক্ষিততে কানাডায়ো অতিৰিক্ত কৰ আৰোপ কৰিব৷ ব্রিটেইনৰ প্রধানমন্ত্রী কিয়েৰ ষ্টাৰমাৰে প্রতিক্রিয়া ব্যক্ত কৰি কয় যে দেশখনে পৰিস্থিতিৰ সৈতে যুঁজিবলৈ সাজু৷ লক্ষণীয় যে ব্রিটেইনৰ ওপৰত ১০ শতাংশ আমদানি শুল্ক আৰোপ কৰা হৈছে৷ ট্রাম্পৰ এই শুল্ক নীতিক লৈ অসন্তুষ্ট জার্মানীয়ে সতর্ক কৰি দি কৈছে যে এই নীতিত উভয়পক্ষই ক্ষতিগ্রস্ত হ’ব৷ ট্রাম্পৰ শুল্ক নীতিক তীব্র সমালোচনা কৰিছে স্পেইনে৷ প্রধানমন্ত্রী পেড্ৰ’ ছানচেজে কয় যে এই পৰিস্থিতিত দেশৰ কোম্পানী আৰু কর্মীৰ সুৰক্ষাৰ বাবে তেওঁ পদক্ষেপ গ্রহণ কৰিব৷ তেনেদৰে আয়াৰলেণ্ডেও আলোচনাৰ মাধ্যমেৰে পৰিস্থিতিটো মোকাবিলা কৰিব বুলি কয়৷ আমেৰিকাৰ বন্ধু ইটালীয়েও বাণিজ্য যুদ্ধৰ পৰা আঁতৰি থাকি আমেৰিকাৰ লগত এই সন্দর্ভত চুক্তিৰ প্রতি আগ্রহী বুলি প্রকাশ কৰিছে৷ আনহাতে, চীনে আমেৰিকাক প্রত্যাহ্বান জনাবলৈ দেশখনে আমেৰিকাৰ ওপৰত অতিৰিক্ত শুল্ক আৰোপৰ ঘোষণা কৰিছে৷ ইপিনে, আমেৰিকাই ভাৰতৰ ওপৰত ২৬ শতাংশ শুল্ক আৰোপ কৰাৰ সিদ্ধান্তই অদূৰ ভৱিষ্যতে ভাৰত–আমেৰিকাৰ বাণিজ্যত কি প্রভাৱ পৰিব, সেই সন্দর্ভত জল্পনা–কল্পনা আৰম্ভ হৈছে৷ মার্কিন ৰাষ্ট্রপতি ট্রাম্পে কয়– বন্ধু ভাৰতৰ ওপৰতো এইবাৰ ২৬ শতাংশ শুল্ক আৰোপ কৰা হৈছে৷ আমেৰিকাৰ এই নতুন আমদানি শুল্ক নীতিয়ে ভাৰতৰ অর্থনীতিত মধ্যমীয়া প্রভাৱ পৰিব বুলি বাণিজ্য মন্ত্রণালয়ে প্রকাশ কৰিছে৷