আজিৰ পৰা বলৱৎ ট্রাম্পৰ নতুন শুল্ক, ভাৰতত পৰিব প্রভাৱ, সুৰা-হীৰা-সোণ-ৰূপো নপৰিব বাদ
নিউজ ডেস্ক, ২ এপ্রিলঃ আমেৰিকা যুক্তৰাষ্ট্রৰ ৰাষ্ট্রপতি ড’নাল্ড ট্রাম্পৰ ঘোষিত নতুন শুল্ক পৰিকল্পনা আজিৰ পৰা বলৱৎ হ’ব৷ আমেৰিকা যুক্তৰাষ্ট্রৰ বৃহত্তম বাণিজ্যিক অংশীদাৰ দেশ ভাৰতৰ ওপৰত ট্রাম্পৰ এই নতুন শুল্কৰ বিৰূপ প্রভাৱ পৰিব৷ দ্বিতীয়বাৰৰ বাবে মার্কিন যুক্তৰাষ্ট্রৰ ৰাষ্ট্রপতি শপত গ্রহণ কৰিয়েই ড’নাল্ড ট্রাম্পে অতিৰিক্তকৈ নুতন শুল্ক আৰোপ কৰাৰ সিদ্ধান্ত গ্রহণে বিশ্বৰ দেশে দেশে তীব্র প্রতিক্রিয়াৰ সৃষ্টি কৰিছে৷ ট্রাম্পৰ সেই নতুন শুল্ক পৰিকল্পনাক লৈ ভাৰততো প্রতিক্রিয়াৰ সৃষ্টি হৈছে৷ ট্রাম্পৰ নতুন শুল্ক পৰিকল্পনাই ভাৰতৰ আমদানি, ৰপ্তানি আৰু দ্বিপাক্ষিক বাণিজ্যত বিৰূপ প্রভাৱ পৰাটো নিশ্চিত৷ সুৰা, মাংস আৰু চেনিকে ধৰি বিভিন্ন সামগ্রীত ট্রাম্পৰ নতুন শুল্ক নীতিয়ে ক্ষতি কৰিব৷ আমেৰিকা যুক্তৰাষ্ট্রলৈ ভাৰতৰ ১৮ শতাংশ সামগ্রী ৰপ্তানি, ৬.২ শতাংশ আমদানি আৰু ১০.৭০ শতাংশ সামগ্রী দ্বিপাক্ষিক বাণিজ্যৰ৷ এই আটাইবোৰতেই নতুন শুল্ক নীতিয়ে ক্ষতিগ্রস্ত কৰিব৷ আমেৰিকা যুক্তৰাষ্ট্রৰ ৩০টা খণ্ডলৈ ভাৰতে ৰপ্তানি কৰে৷ ইয়াৰ ভিতৰত ৬টা কৃষিখণ্ড আৰু ২৪টা উদ্যোগ খণ্ডত৷ ট্রাম্পৰ নতুন নীতিয়ে এই খণ্ডত ক্ষতিসাধন কৰিব৷ নতুন শুল্ক নীতি আৰম্ভ হ’লেই এলকহল, সুৰা আৰু স্পিৰিটৰ ওপৰত প্রভাৱ পৰিব৷ নতুন শুল্ক নীতি আৰম্ভ হ’লেই সুৰাত ১২২.১০ শতাংশ নতুন শুল্ক হ’ব৷ দুগ্ধজাত সামগ্রীত ৩৮.২ শতাংশ৷ এই দুগ্ধজাত সামগ্রীৰ ভিতৰত ঘী, মাখন আৰু গাখীৰৰ পাউদাৰৰ দাম বৃদ্ধি হ’ব৷ মাংসজাতীয় সামগ্রীৰ নতুন শুল্ক হ’ব ২৭.৭৫ শতাংশ৷ সংসাধিত খাদ্য, চেনি আৰু পকোৱাটো ২৪.৯৯ শতাংশ শুল্ক বৃদ্ধি হ’ব৷ জোতা জাতীয় সামগ্রীত ১৫.৫৬ শতাংশ নতুন শুল্ক বলৱৎ হ’লেই উল্লিখিত সামগ্রীৰ দাম বৃদ্ধি হ’ব৷ তেনেদৰে হীৰা, সোণ আৰু ৰূপতো অতিৰিক্ত ১৩.৩২ শতাংশ শুল্ক আৰোপ কৰা হ’ব৷ ঔদ্যোগিক সামগ্রী বিশেষকৈ ফার্মাচিউটিকেল খণ্ডত নতুন শুল্ক ১০.৯০ শতাংশ বৃদ্ধি হোৱাৰ লগে লগেই ঔষধ প্রস্তুতৰ ব্যয় বৃদ্ধি পাব আৰু ঔষধৰ মূল্যও বৃদ্ধি হোৱাটো নিশ্চিত৷ নাৰিকল আৰু সৰিয়হ তেলতো নতুন শুল্ক নীতি আৰোপ হ’ব৷ কার্যতঃ ট্রাম্পৰ শুল্ক নীতিয়ে ভাৰতৰ বাণিজ্যিক খণ্ডত বিস্তৰ ক্ষতিসাধন কৰাৰ সম্ভাৱনা আছে৷