🔹 ট্রাম্পৰ নতুন শুল্ক নীতিৰ পৰিণাম
নিউজ ডেস্ক, ৫ এপ্রিল : বিভিন্ন দেশৰ ওপৰত অতিৰিক্ত শুল্ক আৰোপ কৰাৰ কথা ঘোষণা কৰিছে মার্কিন ৰাষ্ট্রপতি ড’নাল্ড ট্রাম্পে৷ ইয়াৰ ফলত আমেৰিকাসহ প্রায় সমগ্র বিশ্বৰ শ্বেয়াৰ বজাৰলৈ নামি আহিছে পতন৷ নিশাৰ ভিতৰতে কোটি কোটি টকাৰ লোকচান হৈছে উদ্যোগপতিসকলৰ৷ যোৱা দহ বছৰৰ ভিতৰত ইমান ক্ষতিৰ সন্মুখীন হোৱা নাছিল উদ্যোগপতিসকল৷ ৩ এপ্ৰিলত পৃথিৱীৰ ৫০০ ধনী ব্যক্তিয়ে সন্মিলিতভাৱে হেৰুৱাবলগীয়া হৈছে ২০,৮০০ কোটি ডলাৰ৷ ভাৰতীয় মুদ্রাৰ হিচাপত প্রায় ১৭ লাখ কোটি টকা৷ এই তথ্য সদৰী কৰিছে ব্লুমবার্গ সংস্থাৰ বিলিয়নেয়াৰসকলৰ সূচকে৷ আটাইতকৈ বেছি ক্ষতিৰ সন্মুখীন হৈছে ফেচবুকৰ মুৰব্বী মার্ক জুকাৰবার্গ৷ জুকাৰবার্গৰ সংস্থাৰ ৯ শতাংশ, অর্থাৎ ১,৭৯০ কোটি ডলাৰৰ ক্ষতি হৈছে৷ আনফালে, জেফ বেজ’ছৰ আমাজনৰ ক্ষতি হৈছে ১,৫৯০ কোটি ডলাৰ৷