নিয়মীয়া বাৰ্তা, ৩০ মাৰ্চঃ মধ্যাহ্ন ভোজনৰ মানদণ্ডৰ বিষয়ে অভিযোগ নতুন নহয়। এই খাদ্য খোৱাৰ পিছত শিক্ষাৰ্থীসকল অসুস্থ হোৱাৰ বহুতো উদাহৰণ আছে। কেতিয়াবা মধ্যাহ্ন ভোজনত পোক, কেতিয়াবা পইটাচোৰা, কেতিয়াবা পোক-পতংগ আৰু আনকি মৃত সাপো পোৱা গৈছে। এনেধৰণৰ অনুৰূপ ঘটনাই পোহৰলৈ আহিল মধ্য প্ৰদেশত।
স্কুলৰ দুপৰীয়াৰ আহাৰ খোৱাৰ পিছতে এজন এজনকৈ শিক্ষাৰ্থীয়ে শ্ৰেণীত বমি কৰিবলৈ আৰম্ভ কৰিছিল। কেইমিনিটমানৰ পিছত, আন এজন অসুস্থ হৈ পৰিল। কেইমিনিটমানৰ ভিতৰতে গোটেই শ্ৰেণীটো অসুস্থ হৈ পৰিল। এনেদৰে, মধ্যপ্ৰদেশৰ এখন চৰকাৰী বিদ্যালয়ৰ ৫৮ জন শিক্ষাৰ্থী মধ্যাহ্ন ভোজন খোৱাৰ পিছত অসুস্থ হৈ পৰে। শিক্ষাৰ্থীসকলক ততাতৈয়াকৈ এখন স্থানীয় চিকিৎসালয়লৈ লৈ যোৱা হয়।
ঘটনাটো মধ্য প্ৰদেশৰ দিনডোৰী জিলাৰ সামনাপুৰ খণ্ডৰ এখন চৰকাৰী বিদ্যালয়ত সংঘটিত হৈছিল। বিদ্যালয়খনৰ এজন শিক্ষকে এইসন্দৰ্ভত কয় যে ছাত্ৰ-ছাত্ৰীসকলে মধ্যাহ্ন ভোজন খোৱাৰ পিছত অসুস্থ হৈ পৰিছিল। সকলোৰে বমি আৰু পেটৰ বিষৰ লক্ষণ আছিল। ঘটনাটো খাদ্যৰ বিষক্ৰিয়াৰ বাবে সংঘটিত হৈছিল বুলি ধাৰণা কৰা হৈছে।
পাছত অনুসন্ধান কৰি জনা গ’ল যে সেই খাদ্যত আছিল এটা মৃত জেঠী। এজন শিক্ষাৰ্থীয়ে দাইলত এটা মৃত জেঠী ওপঙি থকা দেখিছিল। অভিযোগ উত্থাপন হৈছে যে ছাত্ৰজনে দাইলত জেঠীৰ উপস্থিতিৰ বিষয়ে কৈছিল, কিন্তু কেৱল খাদ্যৰ দায়িত্বত থকা শিক্ষক আৰু কৰ্মচাৰীসকলে সেই ছাত্ৰজনৰ প্লেটহে সলনি কৰিছিল। কিন্তু বাকী শিক্ষাৰ্থীসকলে সেই খাদ্য খায়।