নিয়মীয়া বাৰ্তা, ২৭ জানুৱাৰীঃ উত্তৰ প্ৰদেশৰ চম্বল জিলাৰ বেহজয়ীত দেওবাৰে সংঘটিত হোৱা এক ধৰ্ষণৰ ঘটনা পোহৰলৈ আহিছে । আৰক্ষীৰ কনিষ্টবলৰ পোচাক পিন্ধি অহা এজন অচিনাক্ত লোকে ধৰ্ষণ কৰে দুগৰাকী ভগ্নীক ।
ঘটনা অনুসৰি, এখন বাহনত অহা আৰক্ষীৰ পোচাকধাৰী অচিনাক্ত লোকজনে প্ৰথমে যুৱতী দুগৰাকী বাস কৰা ঘৰটোত প্ৰৱেশ কৰে । তাৰপাছত পৰিয়ালৰ আন সদস্যসকলক সুৰাৰ ব্যৱসায় কৰাৰ আৰোপ লগায় । আৰু দুয়োগৰাকী ভগ্নীক তেওঁৰ সৈতে আৰক্ষী থানালৈ যোৱাৰ কথা কয় ।
ইয়াৰ পাছত দুয়োগৰাকী ভগ্নীক এখন জংঘললৈ নি উপৰ্যুপৰি ধৰ্ষণ কৰে । এই অপৰাধৰ ঘটনা সংঘটিত কৰি লোকজন ঘটনাস্থলীৰ পৰা আঁতৰি যায় ।
ইপিনে যুৱতীদুগৰাকীয়ে ঘটনাৰ কিছুসময়ৰ পাছত পুনৰ ঘৰত উপস্থিত হয় আৰু তেওঁলোকৰ সৈতে সংঘটিত হোৱা ধৰ্ষণকাণ্ডৰ বিষয়ে পৰিয়ালৰ লোকসকলক অৱগত কৰে ।
ইফালে এই ঘটনাৰ পাছত পৰিয়ালটোৱে সমীপৰ বেহজয়ী আৰক্ষী থানাৰ কাষ চাপে । কিন্তু আৰক্ষীয়ে তেওঁলোকৰ ঘৰলৈ কোনো আৰক্ষীকে পঠোৱা নাছিল বুলি স্পষ্ট কৰে ।
অৱশ্যে এই সম্পূৰ্ণ ঘটনাৰ ওপৰত এটা গোচৰ ৰুজু কৰা হৈছে । ইতিমধ্যে আৰক্ষীয়ে সম্পূৰ্ণ ঘটনা সন্দৰ্ভত তদন্ত অব্যাহত ৰাখিছে ।