নিয়মীয়া বাৰ্তা, ২৩ ডিচেম্বৰঃ নাগৰিকত্ব (সংশোধনী) আইনক লৈ বিক্ষোভত জ্বলি থকা উত্তৰ প্রদেশত তৃণমূল কংগ্রেছ (টিএমচি)ৰ কোনো নেতাক প্রৱেশৰ অনুমতি নিদিয়ে প্রশাসনে ৷ দেওবাৰে ৰাজ্যখনৰ আৰক্ষীপ্রধান অ’পি সিঙে ঘোষণা কৰিছে এই কথা ৷ বিক্ষোভত উত্তপ্ত হৈ থকা ৰাজ্যখনৰ বিভিন্ন স্থানত নিৰাপত্তা ব্যৱস্থা কটকটীয়া কৰি তোলা হৈছে বুলি এখন সংবাদ মেলত ঘোষণা কৰি আৰক্ষীপ্রধানগৰাকীয়ে কয় যে সকলো জিলাতে প্রয়োজনীয়সংখ্যক আৰক্ষী মোতায়েন কৰা হৈছে ৷ ইয়াৰ উপৰি অর্ধ–সেনা, ৰেপিড একচন বাহিনী (আৰএএফ), পিএছচি আদি বিভিন্ন বাহিনীৰ জোৱান প্রতিখন জিলাতে মোতায়েন কৰা হৈছে বুলি আৰক্ষীপ্রধানগৰাকীয়ে সংবাদ মেলত ঘোষণা কৰে ৷ জনসাধাৰণক শান্তি–শৃংখলা অটুট ৰাখিবলৈ আহ্বান জনোৱাৰ উপৰি পশ্চিমবংগৰ তৃণমূল কংগ্রেছৰ কোনো নেতাকে প্রৰোচনামূলক মন্তব্য আগবঢ়োৱাৰ বাবে উত্তৰ প্রদেশত প্রৱেশৰ সুযোগ নিদিয়ে বুলিও স্পষ্ট কৰি দিছে আৰক্ষীপ্রধান অ’পি সিঙে ৷