নিয়মীয়া বাৰ্তা, ২৮ মেঃ বিশ্বজুৰি ঘাতক ৰূপ ধাৰণ কৰা ক’ভিড–১৯ বা ক’ৰোনা ভাইৰাছ মহামাৰীক প্রতিৰোধ কৰিবলৈ দেশে দেশে লকডাউন ঘোষণা কৰাৰ ফলত হঠাতে কর্মহীন হৈ পৰিছে অসংখ্য লোক৷ ক’ভিড–১৯ মহামাৰীয়ে সমগ্র পৃথিৱীতে জীৱিকা হৰণ কৰিছে অসংখ্য লোকৰ৷ কিন্তু ইয়াৰ দ্বাৰা আটাইতকৈ বেছি ক্ষতিগ্রস্ত হৈছে যুৱপ্রজন্মৰ কর্মীসকল৷
ৰাষ্ট্রসংঘৰ তৰফৰ পৰা আজি সদৰী কৰা অনুসৰি ২৯ বছৰ বয়সৰ তলৰ প্রতি ৬জন যুৱকৰ এজনেই হৈপৰিছে এই লকডাউনৰ সময়ত কর্মহীন৷ জীৱিকা হেৰুওৱা এই লোকসকলক বিশ্বৰ সর্বোচ্চ সংস্থা ৰাষ্ট্রসংঘই আখ্যা দিছে ‘লকডাউন জেনেৰেচন’ বুলি৷ আন্তর্জাতিক শ্রম সংস্থা (আইএল’)ৰ এক অধ্যয়ন অনুসৰি ন’ভেল ক’ৰোনা ভাইৰাছ সংকটে যুৱপ্রজন্মক উপহাৰ দিছে কেৱল কর্মহীনতা৷
আগন্তুক কেইবা দশকলৈ এই কাম হেৰুওৱা যুৱকসকলৰ ওপৰত ভয়াৱহ প্রভাৱ পৰিব বুলিও আইএল’ৰ প্রতিবেদনত উল্লেখ কৰা হৈছে৷ আনকি বহু সুদক্ষ যুৱকৰ ভৱিষ্যৎ কেৰিয়াৰ অন্ধকাৰত বিলীন হ’ব পাৰে বুলিও আশংকা কৰা হৈছে৷ আইএল’ৰ মুৰব্বী গাই ৰাইডাৰে উল্লেখ কৰা অনুসৰি মহামাৰীৰ পৰা পৰিত্রাণ পালেও পৃথিৱীজুৰি সৃষ্টি হ’ব এক কর্মহীন প্রজন্ম৷ এই কর্মহীন লোকৰ সংখ্যা হ’ব পাৰে ২৬৭ নিযুত৷
২০১৯ত বিশ্বজুৰি নিবনুৱা যুৱক–যুৱতীৰ হাৰ আছিল ১৩.৬ শতাংশ৷ কিন্তু মহামাৰী প্রতিৰোধৰ এই লকডাউনৰ বাবে কর্মহীন যুৱক–যুৱতীৰ সংখ্যাৰ হাৰ হৈ পৰিব ১৭ শতাংশতকৈ অধিক৷ ইফালে, প্রাণঘাতী ক’ৰোনা ভাইৰাছ মহামাৰী বা ক’ভিড–১৯ৰ সংক্রমণ অধিক দ্রুত হৈ পৰিছে ভাৰতত৷ বিগত ২৪ ঘণ্টাত ভাৰতত ৬,৩৮৭গৰাকী লোক নতুনকৈ ক’ৰোনা ভাইৰাছত আক্রান্ত হোৱাৰ উপৰি এই সময়ছোৱাত মাৰাত্মক ভাইৰাছবিধত প্রাণ হেৰুৱাইছে ১৭০গৰাকী লোকে৷ এই বাতৰি যুগুতোৱা পৰলৈ মাৰাত্মক ভাইৰাছবিধৰ দ্বাৰা দেশত সংক্রমিত মুঠ লোকৰ সংখ্যা বৃদ্ধি পাইছে ১,৫১,৭৬৭গৰাকীলৈ৷
ইফালে, ভাইৰাছবিধৰ দ্বাৰা আক্রান্ত হৈ মৃত্যুমুখত পৰা লোকৰ সংখ্যা বৃদ্ধি পাইছে ৪,৩৮৭গৰাকীলৈ৷ কেন্দ্রীয় স্বাস্থ্য মন্ত্রালয়ে সদৰী কৰিছে এই তথ্য৷ ভাৰতত ক’ৰোনাৰ দ্বাৰা সংক্রমিত হৈ চিকিৎসা গ্রহণ কৰি থকা লোকৰ সংখ্যা ৮৩,০০৪গৰাকী বুলি স্বাস্থ্য মন্ত্রালয়ে এক বিবৃতিত উল্লেখ কৰাৰ উপৰি ইতিমধ্যে ৬৪,৪২৫গৰাকী সুস্থ হৈ ঘৰলৈ ওভতা বুলিও প্রকাশ কৰিছে৷