নিয়মীয়া বাৰ্তা, ২৯ ফেব্রুৱাৰীঃ শুকুৰবাৰে গুজৰাটৰ ছেণ্ট চিটী নর্মদাত ইণ্ডিয়া ফাউণ্ডেচনৰ দ্বাৰা আয়োজিত আইডিয়াছ কনক্লেভ ২০২০ অনুষ্ঠানত মুখ্যমন্ত্রী সর্বানন্দ সোণোৱালক ২০২০ বর্ষৰ সন্মানীয় ড০ শ্যামাপ্রসাদ মুখার্জী বঁটা প্রদান কৰা হয় ৷ ভাৰতবর্ষৰ বৈদেশিক পৰিক্রমা বিভাগৰ মন্ত্রী এছ জয়শংকৰ আৰু মালদ্বীপৰ পিপলছ মজলিছৰ অধ্যক্ষ মহম্মদ নাছিদে মুখ্যমন্ত্রী সোণোৱালক এই বঁটা প্রদান কৰে৷ এই বঁটাত আছে এটা স্মাৰক, প্রশস্তি–পত্র আৰু ১ লাখ টকাৰ চেক ৷ এই বর্ষত ৰাজনীতিৰ ক্ষেত্রখনলৈ আগবঢ়োৱা বিশিষ্ট বৰঙণিৰ বাবে মুখ্যমন্ত্রী সর্বানন্দ সোণোৱালক এই বঁটা প্রদান কৰা হয় ৷
এই বঁটা গ্রহণ কৰি প্রদান কৰা ভাষণত মুখ্যমন্ত্রী সর্বানন্দ সোণোৱালে এই বঁটা প্রাপ্তিয়ে তেওঁৰ দায়িত্ব আৰু কর্তব্য অধিক বৃদ্ধি কৰিলে বুলি কয় ৷ এই বঁটাই আগন্তুক সময়ত তেওঁক দেশৰ অখণ্ডতাৰ দিশত অধিক দায়বদ্ধতাৰে সেৱা আগবঢ়োৱাৰ বাবে উদ্বুদ্ধ কৰিছে বুলিও তেওঁ কয় ৷ ভাষণ প্রসংগত মুখ্যমন্ত্রীয়ে অসম আৰু গুজৰাটৰ এক ঐতিহাসিক সম্পর্ক আছে বুলি উল্লেখ কৰি ভগৱান শ্রীকৃষ্ণই ৰুক্মিণীক বিবাহ কৰাৰ উপৰি সুধাকণ্ঠ ড০ ভূপেন হাজৰিকাই গুজৰাটৰ জীয়ৰী প্রিয়ম্বদা পাটিলক বিবাহ কৰোৱা বিষয়টো উল্লেখ কৰে ৷ দেশৰ প্রগতি, ঐক্য আৰু সংহতি বজাই ৰখাৰ দিশত গুজৰাটে বহুসংখ্যক মনীষীৰ জন্ম দিছে বুলি উল্লেখ কৰি মুখ্যমন্ত্রীয়ে এই ভূমিৰ পৰাই জাতিৰ পিতা মহাত্মা গান্ধী, চর্দাৰ বল্লভভাই পেটেলৰ দৰে যুগজয়ী ব্যক্তিৰ জন্ম হৈছিল বুলিও কয় ৷ ড০ শ্যামাপ্রসাদ মুখার্জীৰ প্রসংগত মুখ্যমন্ত্রী সোণোৱালে কয়– ড০ মুখার্জী এগৰাকী প্রকৃত দেশপ্রেমিক আৰু জাতীয়তাবাদী নেতা আছিল ৷ এইগৰাকী ব্যক্তিয়ে ১৯৫১ চনত ভাৰতীয় জনসংঘৰ দৰে এক শক্তিশালী মঞ্চৰ জৰিয়তে ভাৰতবর্ষক একত্রিত কৰাৰ প্রয়াস কৰিছিল ৷ বর্তমান সময়তো জনসংঘৰ আদর্শৰে ভাৰতীয় জনতা পার্টীয়ে ভাৰতবর্ষৰ দৰে এখন বিশাল আৰু মহান দেশক এক উপযুক্ত তথা শক্তিশালী ৰাজনৈতিক, সামাজিক আৰু অর্থনৈতিক মঞ্চ প্রদান কৰি দেশৰ সর্বাংগীণ বিকাশৰ দিশত এক নতুন মাত্রা প্রদান কৰিছে ৷
এই অনুষ্ঠানত কেন্দ্রীয় বৈদেশিক পৰিক্রমা মন্ত্রী এছ জয়শংকৰ আৰু মালদ্বীপৰ পিপলছ মজলিছৰ অধ্যক্ষ মহম্মদ নাছিদ আৰু ৰাজ্যসভাৰ সাংসদ সুৰেশ প্রভুৱেও ভাষণ প্রদান কৰে ৷ ইণ্ডিয়া ফাউণ্ডেচনৰ ব’ড অৱ গৱর্নছৰ সদস্য ৰামমাধৱ আৰু শৌর্য ডোভালকে ধৰি বহুসংখ্যক গণ্য–মান্য ব্যক্তি এই অনুষ্ঠানত উপস্থিত থাকে ৷ উল্লেখ্য যে ইণ্ডিয়া ফাউণ্ডেচনে প্রতিবছৰে দেশৰ অর্থনৈতিক দিশলৈ বিশেষ অৱদান আগবঢ়োৱা এগৰাকী বিশিষ্ট ব্যক্তিক ড০ বি আৰ শ্বেনয় বঁটা, ৰাজনীতিলৈ বিশেষ অৱদান আগবঢ়োৱা এগৰাকী বিশিষ্ট ৰাজনীতিকক ড০ শ্যামাপ্রসাদ মুখার্জী বঁটা, সামাজিক কাম–কাজৰ দিশত বিশিষ্ট বৰঙণি আগবঢ়োৱা এগৰাকী বিশিষ্ট ব্যক্তিলৈ শ্রীনাৰায়ণ বঁটা আৰু সাংস্কৃতিক দিশলৈ বিশেষ অৱদান আগবঢ়োৱা এগৰাকী বিশিষ্ট সাংস্কৃতিক কর্মীক ওস্তাদ বিছমিল্লাহ খান বঁটা প্রদান কৰি আহিছে৷ বিশিষ্ট অর্থনীতিবিদ এন কে সিঙক এই বর্ষৰ ড০ বি আৰ শ্বেনয় বঁটা প্রদান কৰাৰ লগতে চলচ্চিত্র নির্মাতা ভাৰতবালাক ওস্তাদ বিছমিল্লাহ খান বঁটা আৰু বিশিষ্ট সমাজকর্মী কে পাৰাচৰণক শ্রীনাৰায়ণ গুৰু বঁটা প্রদান কৰা হয় ৷