জুলাইত অসম-বাংলা সীমান্তৰ স্মাৰ্ট ফেন্স

নিয়মীয়া বাৰ্তা ৩০ ডিচেম্বৰঃ অসমক চুই যোৱা ভাৰত–বাংলাদেশ সীমান্তৰ নদীৰ পাৰত চলি থকা ‘স্মার্ট ফেন্স’ৰ কাম অহা বছৰ জুলাই মাহত সম্পূর্ণ হ’ব৷ এই মন্তব্য প্রকাশ কৰিছে ভাৰতীয় সীমান্ত নিৰাপত্তা বাহিনী, চমুকৈ বি এছ এফৰ সঞ্চালকপ্রধান ভি কে জোহৰীয়ে৷ তেওঁ কয় যে সীমান্তৰ নদীৰ পাৰত এই ‘স্মার্ট ফেন্স’ৰ প্রকল্প সম্পূর্ণ হোৱাৰ ক্ষেত্রত চলিত বর্ষত হোৱা ভয়াৱহ বান, বৰষুণৰ বাবে ছমাহ পলম হ’ল৷ পূর্বতে এই প্রকল্পৰ কাম ২০১৯ চনৰ ডিচেম্বৰ অর্থাৎ চলিত মাহতে সম্পূর্ণ কৰাৰ লক্ষ্য লোৱা হৈছিল৷ ব’ডাৰ গার্ডছ বাংলাদেশৰ সঞ্চালকপ্রধান মেজৰ জেনেৰেল ছাফিনুল ইছলামৰ সৈতে নতুন দিল্লীত এখন সংবাদ মেলত অংশ লৈ বি এছ এফৰ সঞ্চালকপ্রধানজনে এই কথা ব্যক্ত কৰে৷ সীমান্তৰ নদীৰ পাৰত কৰি থকা এই ‘স্মার্ট ফেন্স’ৰ কাম অসমৰ ধুবুৰীৰ পৰা ব্রহ্মপুত্রৰ দুয়োপাৰে ৫৫ কিলোমিটাৰ জুৰি কৰি থকা হৈছে৷ এই স্মার্ট ফেন্সত আছে প্রযুক্তিগত পর্যবেক্ষণ আৰু এলার্মৰ ব্যৱস্থা৷ ইফালে এই সংবাদ মেলত অংশ লৈ বিজিবিৰ সঞ্চালকপ্রধান ছাফিনুল ইছলামে কয় যে এন আৰ চি ভাৰত চৰকাৰৰ সম্পূর্ণ আভ্যন্তৰীণ বিষয়৷ বাংলাদেশৰ সেনাই ভাৰতলৈ অবৈধ অনুপ্রৱেশত বাধা দিবলৈ কাম কৰি যাব বুলিও ইছলামে মন্তব্য কৰে৷