নিয়মীয়া বাৰ্তা, ২৯ ডিচেম্বৰঃ নাগৰিকত্ব সংশোধনী আইনৰ বিৰুদ্ধে দেশৰ সর্বস্তৰৰ জনসাধাৰণে প্রতিবাদ অব্যাহত ৰখাৰ সময়তে ভাৰতীয় জনতা পার্টীয়ে দেশৰ দলিত সম্প্রদায়ৰ নেতাসকলক এই আইনৰ উপযোগিতা বুজোৱাৰ লক্ষ্য লৈছে৷ এই লক্ষ্যৰে কাইলৈ নতুন দিল্লীত বিজেপিৰ কার্যকৰী সভাপতি জে পি নাড্ডাৰ অধ্যক্ষতাত এখন বিশেষ বৈঠক আহ্বান কৰা হৈছে৷ এই বৈঠকত অনুসূচিত জাতিৰ সকলো বিজেপি সাংসদৰ লগতে এই সম্প্রদায়ক প্রতিনিধিত্ব কৰা দেশৰ বিশিষ্ট ব্যক্তি আৰু জনপ্রতিনিধি উপস্থিত থকাৰ কথা আছে৷ বিশেষকৈ বিজেপিয়ে এই বৈঠকলৈ দেশৰ আগশাৰীৰ অনুসূচিত জাতিৰ বুদ্ধিজীৱী, চিকিৎসক, শিক্ষাবিদ আৰু বিভিন্ন ক্ষেত্রত পেছাদাৰী ব্যক্তিক আমন্ত্রণ জনোৱা বুলি জানিব পৰা গৈছে৷ কেন্দ্রীয় চৰকাৰে নতুনকৈ প্রণয়ন কৰা নাগৰিকত্ব সংশোধনী আইনখনে অনুসূচিত জাতিৰ লোকসকলক কিদৰে উপকৃত কৰিব, সেয়া ব্যাখ্যা কৰাৰ উদ্দেশ্যে বিজেপিয়ে এই বিশেষ বৈঠকৰ আহ্বান জনাইছে৷ দলটোৰ এক সূত্রই আজি দাবী কৰে যে পাকিস্তানত ধর্মীয় নির্যাতনৰ বলি হৈ বৃহৎ পৰিমাণৰ অনুসূচিত জাতি–জনজাতিৰ লোক ভাৰতলৈ আহিছিল৷ এই আইনৰ জৰিয়তে তেওঁলোক উপকৃত হ’ব৷ মন কৰিবলগীয়া যে ধর্মীয় নির্যাতনৰ সন্মুখীন হৈ ২০১৪ৰ ৩১ ডিচেম্বৰৰ পূর্বে ভাৰতত প্রৱেশ কৰা পাকিস্তান, বাংলাদেশ আৰু আফগানিস্তানৰ লোকক ভাৰতীয় নাগৰিকত্ব প্রদান কৰিবলৈ এনডিএ চৰকাৰে নাগৰিকত্ব সংশোধনী আইন প্রণয়ন কৰিছে৷