নিয়মীয়া বাৰ্তা, ২২ফেব্ৰুৱাৰী: ছত্তিশগড়ত মাওবাদী বিদ্রোহীয়ে পাশৱিকভাৱে এগৰাকী আৰক্ষী কর্মীক ডিঙি ৰেপি হত্যা কৰা ঘটনাক লৈ দেশজুৰি সৃষ্টি হৈছে চাঞ্চল্য৷ মাত্র কেইদিনমান পূর্বে বিজেপি নেতা এগৰাকীক ঘৰৰ ভিতৰতে হত্যা কৰিছিল মাওবাদীয়ে৷ এইবাৰ মৃত্যু হৈছে আৰক্ষীৰ এগৰাকী হেড কনিষ্টবলৰ৷ মাওবাদী অধ্যুষিত বীজাপুৰত সংঘটিত হৈছে এই ঘটনা৷ আৰক্ষী সূত্রই সদৰী কৰা অনুসৰি নিহত হেড কনিষ্টবলজনৰ নাম পিণ্ডিৰাম ভেট্টি৷ দেওবাৰে নিশা ভেট্টিক ডিঙি ৰেপি হত্যা কৰে অচিনাক্ত মাওবাদী বিদ্রোহীয়ে৷ আৰক্ষীয়ে এই হত্যাকাণ্ডত মাওবাদী জড়িত থকা বুলি দাবী কৰিছে যদিও এই সন্দর্ভত কোনো অভিযুক্তৰ নাম প্রকাশ কৰিব পৰা নাই৷ ডাণ্টেৱাৰা জিলাত কর্মৰত আছিল পিণ্ডিৰাম ভেট্টি৷ কাডেনাৰ গাঁৱত ভাতৃৰ বিবাহ অনুষ্ঠানত অংশগ্রহণ কৰিবলৈ গৈছিল তেওঁ৷ সেই বিবাহ অনুষ্ঠানতে মাওবাদীয়ে প্রৱেশ কৰি নৃশংসভাৱে ভেট্টিক হত্যা কৰা বুলি আৰক্ষীয়ে দাবী কৰিছে৷ স্মর্তব্য যে মাত্র কেইদিনমান পূর্বে বিশাখাপট্টনমত আৰক্ষীৰ প্রশিক্ষণ শেষ কৰি উভতিছিল ভেট্টি৷