নিয়মীয়া বাৰ্তা, ১৩ ফেব্ৰুৱাৰীঃ প্রখ্যাত চিত্রকৰ ভেন গ’গৰ ১৯৬০ৰ দশকতে মাত্র ৪ পাউণ্ডত বিক্রী হোৱা ছবি এখন নিলামৰ বাবে সাজু কৰা হৈছে৷ এই ছবিখনৰ নিলাম মূল্য ধার্য কৰা হৈছে ১৩ নিযুত ডলাৰ৷
উল্লেখনীয় যে ১৮৮৫ চনত এই ছবিখন অংকন কৰিছিল চিত্রকৰ ভিনচেণ্ট ভেন গ’গে৷ এই ছবিখন ভেন গ’গৰ হয় নে নহয় তাক লৈ বিভিন্ন মহলত সৃষ্টি হৈছিল সন্দেহ৷ কিন্তু শেহতীয়াকৈ এক্সৰেত ছবিখনত ভিনচেণ্ট ভেন গ’গৰ স্বাক্ষৰ ধৰা পৰিছে৷ ‘পিজেণ্ট ৱ’মেন ইন ফ্রণ্ট অৱ এ ফার্ম হাউছ’ শীর্ষক ছবিখন ভেন গ’গে চিত্রকৰ হিচাপে জীৱনৰ আৰম্ভণিৰ কালছোৱাত অংকন কৰিছিল বুলি ধাৰণা কৰা হৈছে৷ ষ্টেফ’ডশ্বায়াৰৰ নিলামগৃহত এই ছবিখন বিক্রী কৰা হ’ব বুলি এটা সূত্রই সদৰী কৰিছে৷