নিয়মীয়া বার্তা, ১৯ মার্চঃ ক’ভিড–১৯ অর্থাৎ কৰোনা ভাইৰাছে মানৱ শৰীৰত প্রতিৰোধী ব্যৱস্থালৈ কেনেধৰণৰ প্রত্যাহ্বান কঢ়িয়াই আনে তাৰ তথ্য লাভ কৰিছে অষ্ট্রেলিয়াৰ চিকিৎসা বিশেষজ্ঞই৷ শেহতীয়াকৈ ‘নেচাৰ মেডিচিন’ জার্নালত অষ্ট্রেলিয়াৰ বিজ্ঞানীৰ এই সবিশেষ প্রতিবেদন প্রকাশ পাইছে৷ অষ্ট্রেলিয়াৰ বিশেষজ্ঞ চিকিৎসকসকলৰ মতে নতুন এই ক’ৰোনা ভাইৰাছত আক্রান্ত লোকসকলে ফ্লুত আক্রান্ত ৰোগীৰ দৰেই আৰোগ্য লাভ কৰিবলৈ সক্ষম হৈছে৷
বিশেষজ্ঞসকলৰ মতে, মানৱ শৰীৰৰ প্রতিৰোধী কোষবোৰে ক’ৰোনা ভাইৰাছৰ প্রতিষেধক টিকা উদ্ভাৱনৰ ক্ষেত্রত সহায় কৰিব চিকিৎসা বিজ্ঞানক৷ স্মর্তব্য যে বিশ্বজুৰি মাৰাত্মক এই ভাইৰাছৰ সংক্রমণত এতিয়ালৈকে প্রায় ৭ হাজাৰ লোকৰ মৃত্যু হোৱাৰ উপৰি ১ লাখ ৬০ হাজাৰতকৈ অধিক আক্রান্ত হৈছে৷
লক্ষণীয়ভাৱে অষ্ট্রেলিয়াৰ চিকিৎসা বিজ্ঞানীয়ে মানৱ শৰীৰত ক’ৰোনাৰ প্রতিৰোধী কোষৰ মানচিত্রও অংকন কৰি উলিয়াইছে৷ বিশেষজ্ঞ চিকিৎসা বিজ্ঞানী কেথেৰিন কেডজির্ছকাই নেচাৰত প্রকাশ পোৱা প্রতিবেদনত উল্লেখ কৰা অনুসৰি এয়া এক গুৰুত্বপূর্ণ আৱিষ্কাৰ৷ কাৰণ ক’ৰোনা ভাইৰাছৰ সৈতে শৰীৰৰ প্রতিৰোধী ব্যৱস্থাৰ তথ্য প্রথম পোহৰলৈ আহিছে৷