হাতীপটি তাৰকাৰাজ্যৰ বাহিৰত আৱিষ্কাৰ গ্রহ

নিয়মীয়া বাৰ্তা ২৮ অক্টোবৰঃ আমেৰিকাৰ মহাকাশ গৱেষণা সংস্থা নাছাই প্রথমবাৰৰ বাবে হাতীপটি তাৰকা ৰাজ্যৰ বাহিৰত প্রথমটো গ্রহৰ সন্ধান লাভ কৰিবলৈ সক্ষম হৈছে৷ অৱশ্যে এয়া গ্রহ বুলি গৰিষ্ঠসংখ্যক জ্যোতির্বিজ্ঞানীয়ে ধাৰণা কৰিছে যদিও একাংশই এতিয়াও তাক মানি ল’ব পৰা নাই৷ নাছাৰ চন্দ্রা এক্স–ৰে’ অবজাৰভেটৰীৰ তৰফৰ পৰা এই গ্রহটোৰ সন্ধান কৰিবলৈ সক্ষম হোৱা বুলি দাবী কৰিছে৷ মেছিয়াৰ–৫১ নামৰ এক সর্পিল তাৰকাৰাজ্যত সন্ধান পোৱা গৈছে গ্রহটোৰ৷ গৱেষকসকলে ধাৰণা কৰা অনুসৰি সৌৰজগতৰ বাহিৰত আৱিষ্কাৰ হোৱা এই গ্রহটো শনিগ্রহ সদৃশ৷ স্মর্তব্য যে পূর্বে সৌৰজগতৰ বাহিৰত বহু গ্রহ জ্যোতির্বিজ্ঞানীসকলে আৱিষ্কাৰ কৰিবলৈ সক্ষম হৈছে৷ কিন্তু হাতীপটি তাৰকা ৰাজ্যৰ বাহিৰত এয়া প্রথমটো গ্রহৰ আৱিষ্কাৰ৷

হার্ভার্ডৰ জ্যোতির্পদার্থ বিজ্ঞান কেন্দ্রৰ বিজ্ঞানী ৰোছান ডি ষ্টেফানোৱে সদৰী কৰা অনুসৰি পূর্বে এক্স’প্লেনেট বা সৌৰজগতৰ বাহিৰৰ বহু গ্রহ আৱিষ্কাৰ কৰিছে৷ কিন্তু সৌৰজগতৰ ইমান দূৰত প্রথমটো গ্রহৰ সন্ধান পোৱা গৈছে৷ লক্ষণীয়ভাৱে এই গ্রহৰ সন্ধান পোৱাৰ ফলত অন্য তাৰকাৰাজ্য সমূহৰ বিভিন্ন বৈশিষ্ট্য জ্যোতির্বিজ্ঞানীসকলে লাভ কৰিবলৈ সক্ষম হ’ব বুলি ধাৰণা কৰা হৈছে৷ স্মর্তব্য যে এম ৫১–ইউ এল এছ–১ পদ্ধতিৰে এই গ্রহটোৰ অৱস্থান নিশ্চিত কৰা হৈছে৷ এই পদ্ধতি অনুসৰি সূর্যৰ ২০ গুণ ভৰৰ এটা নক্ষত্র বা কৃষ্ণ গহ্বৰত এই গ্রহটোৱে প্রদক্ষিণ কৰা বুলি ধাৰণা কৰা হৈছে৷ শনিসদৃশ গ্রহটোৰ কৃষ্ণগহ্বৰ বা অন্য জ্যোতিষ্কক প্রদক্ষিণ কৰি থকা বিষয়টোক ধাৰণাহে কৰা হৈছে৷

লক্ষণীয়ভাৱে হাতীপটি তাৰকা ৰাজ্যত এতিয়ালৈকে যিমানবোৰ এক্স’প্লেনেট আৱিষ্কাৰ হৈছে সেইসমূহৰ দূৰত্ব পৃথিৱীৰ পৰা ৩০০০ আলোকবর্ষ বা তাতকৈ কম৷ কিন্তু মেছিয়াৰ–৫১ তাৰকাৰাজ্যত যিটো গ্রহৰ সন্ধান পোৱা গৈছে তাৰ দূৰত্ব পৃথিৱীৰ পৰা প্রায় ২৮ নিযুত আলোকবর্ষ৷ নাছাৰ তৰফৰ পৰা সদৰী কৰা অনুসৰি ইয়াক লৈ অধিক গৱেষণাৰ প্রয়োজন আছে৷ হয়তো এই গ্রহৰ ওপৰত অধ্যয়ন চলালে মেছিয়াৰ তাৰকাৰাজ্যৰ বহু নক্ষত্র আৰু গ্রহৰ সন্ধান পোৱা যাব পাৰে৷ বিশ্বব্রহ্মাণ্ড বা এই মহাবিশ্বৰ পৰিধি যে অসীম তাক নাছাই পুনৰবাৰ সদৰী কৰিছে৷ ইতিমধ্যে এই সন্দর্ভত সবিশেষ তথ্য প্রকাশ পাইছে বিজ্ঞান জার্নাল ‘নেচাৰ এষ্ট্র’নমী’ত