🔹 উচ্চতম ন্যায়ালয়ৰ ঐতিহাসিক ৰায় : ২০১৬ৰ নিয়োগ প্রক্রিয়াত ব্যাপক অনিয়ম
নিউজ ডেস্ক, ৪ এপ্রিল : পশ্চিমবংগৰ মমতা বেনার্জী নেতৃত্বাধীন তৃণমূল কংগ্রেছ চৰকাৰৰ বাবে চৰম হতাশা সৃষ্টি কৰি কালি উচ্চতম ন্যায়ালয়ে ৰায়দান কৰে যে ২০১৬ চনত ৰাজ্যিক স্কুল ছার্ভিচ কমিছনৰ অধীনত শিক্ষকৰ চাকৰি লাভ কৰা ২৫,৭৫২গৰাকী শিক্ষক–অশিক্ষক কর্মীৰ চাকৰি নিয়মবহির্ভূত আছিল৷ উচ্চতম ন্যায়ালয়ে ঐতিহাসিক ৰায়যোগে এই ২৫,৭৫২গৰাকী শিক্ষক–অশিক্ষক কর্মীৰ চাকৰি বাতিল কৰিছে৷ ইয়াৰ উপৰি যিসকল শিক্ষকৰ বাবে ‘অযোগ্য’ হিচাপে চিহ্ণিত হৈছে, তেওঁলোকে বেতনৰ ধন ওভতাব লাগিব বুলিও নির্দেশ দিছে শীর্ষ আদালতখনে৷ মুখ্য ন্যায়াধীশ সঞ্জীৱ খান্না নেতৃত্বাধীন বিচাৰপীঠে উল্লেখ কৰা অনুসৰি, ২০১৬ চনৰ নিয়োগ প্রক্রিয়াৰ মাধ্যমত যিসকলে নিযুক্তি লাভ কৰিছিল তেওঁলোকৰ ভিতৰৰ ‘অযোগ্য’ প্রায় ৭,০০০ শিক্ষক–অশিক্ষক কর্মীয়ে বেতনৰ ধন ওভতাই দিব লাগিব৷ কিন্তু যিসকল ‘অযোগ্য’ হিচাপে চিহ্ণিত হোৱা নাই, তেওঁলোকে বেতনৰ ধন ওভতাই দিব নালাগে৷ ইফালে, বিশেষভাৱে সক্ষমসকলে বেতন বা দৰমহাৰ ধন ওভতাই দিব নালাগে বুলি শীর্ষ আদালতখনত বিচাৰপীঠে ৰায়দান কৰাৰ উপৰি এনে কর্মীসকলে আগন্তুক ৩ মাহলৈ নতুন নিযুক্তি নোপোৱালৈকে চাকৰি কৰি থাকিব পাৰিব৷ তেওঁলোকে নিয়মীয়াকৈ দৰমহাও লাভ কৰিব৷ শীর্ষ আদালতখনৰ এই ৰায়ৰ লগে লগে পশ্চিমবংগত হাহাকাৰ পৰিস্থিতিৰ সৃষ্টি হৈছে৷ স্মর্তব্য যে ২০২৪ চনৰ ২২ এপ্রিলত কলকাতা উচ্চ ন্যায়ালয়ে বাতিল কৰিছিল ২০১৬ৰ এই নিযুক্তি৷