নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

৫০,০০০ নিদিয়া বাবেই শহুৰেকৰ ঘৰত প্রৱেশত বাধা

🔹 ঘৰৰ সন্মুখতে চাৰি দিন ধৰি বহি থাকিল ন-বোৱাৰী

নিউজ ডেস্ক, ৪ এপ্রিল : সদ্য বিবাহিত এজনী তৰুণী বিয়াৰ পিছত স্বামীৰ সৈতে মধুচন্দ্রিকালৈও গৈছে৷ তাৰ পিছত একেলগে ৰঙৰ উৎসৱ হোলী উদযাপন কৰে দুই নৱবিবাহিত স্বামী–স্ত্রীয়ে৷ কিন্তু ইয়াৰ পিছতেই আৰম্ভ হয় সমস্যা৷ যৌতুকৰ বাবে নতুন বোৱাৰীক ঘৰত প্রৱেশ কৰিবলৈ নিদিলে শহুৰেকৰ পৰিয়ালে৷ কিন্তু সহজতে এৰি দিয়া বিধৰ নহয় তৰুণীজনী৷ চাৰি দিন ধৰি শহুৰেকৰ বাসগৃহৰ সন্মুখৰ পথত বহি প্রতীক্ষা কৰি আছে তৰুণীজনীয়ে৷ নৱবিবাহিত এই তৰুণীৰ আশা যে শহুৰেকৰ পৰিয়ালৰ মানুহে আহি তেওঁক ঘৰত প্রৱেশ কৰিবলৈ দিব৷ এই ঘটনাটো উত্তৰ প্রদেশৰ এটুজেড কলনীৰ৷ যোৱা ২ ফেব্রুৱাৰীত শালিনী সিংহলৰ বিয়া হয় প্রণৱ সিংহলৰ সৈতে৷ ১৫ ফেব্রুৱাৰীত নৱবিবাহিত দম্পতীয়ে ইণ্ডোনেছিয়ালৈ মধুচন্দ্রিকা কটাবলৈ যায়৷ দহ দিন ইণ্ডোনেছিয়াত থাকি পুনৰ ঘূৰি আহে তেওঁলোক৷ ইয়াৰ পিছত শালিনীয়ে ৫ মার্চলৈকে শহুৰেকৰ বাসগৃহতেই আছিল৷ কিন্তু হোলীৰ বাবে পিতৃগৃহলৈ যায় শালিনী৷ ৩০ মার্চত পুনৰ শহুৰেকৰ ঘৰলৈ ওভতে শালিনী৷ ইয়াৰ পিছতেই সমস্যাৰ সূত্রপাত ঘটে৷ অভিযোগ অনুসৰি, শালিনীক দেখাৰ লগে লগে ঘৰৰ দুৱাৰ খুলি দিবলৈ অস্বীকাৰ কৰে শহুৰেকৰ পৰিয়ালৰ লোকসকলে৷ জোৰকৈ শালিনীয়ে ঘৰত প্রৱেশৰ চেষ্টা চলায় যদিও পদূলিৰ বাহিৰলৈ শালিনীক উলিয়াই দিয়া হয়৷ বাধ্য হৈ ঘৰৰ সন্মুখৰ পথতেই অৱস্থান কৰে শালিনীয়ে৷ শালিনীয়ে সংবাদ মাধ্যমক জনোৱা অনুসৰি, ৫০,০০০ টকা যৌতুকৰ ধন হিচাপে আদায় নিদিয়া বাবে স্বামী আৰু শহুৰেকৰ পৰিয়ালে তেওঁৰ সৈতে এনে আচৰণ কৰিছে৷ ইফালে, সমস্ত অভিযোগ অস্বীকাৰ কৰিছে প্রণৱে৷ প্রণৱে উল্লেখ কৰা অনুসৰি, তেওঁৰ পত্নী শালিনীয়ে পৰিয়ালৰ সকলোকে ভয় দেখুৱাইছে৷ গতিকে, তেওঁলোক নিৰাপত্তাহীনতাত ভুগিছে৷ বিশেষকৈ মীৰাটত প্রেমিকৰ সৈতে পত্নীয়ে মিলি স্বামীক হত্যা কৰা ঘটনা সংঘটিত হোৱাৰ পিছৰে পৰা প্রণৱৰ পৰিয়ালেও আতংকত ভুগিবলগীয়া হৈছে বুলি সংবাদ মাধ্যমক জানিবলৈ দিয়ে৷ গতিকে, নিৰাপত্তাৰ খাতিৰত শালিনীক বাসগৃহত প্রৱেশ কৰিবলৈ দিয়া নাই বুলি প্রণৱে সংবাদ মাধ্যমক জানিবলৈ দিয়ে৷

You might also like