নিয়মীয়া বাৰ্তা, ২৯ এপ্ৰিলঃ ক’ৰোনা ভাইৰাছ মহামাৰী প্রতিৰোধৰ বাবে জাৰি কৰা লকডাউনৰ সময়তে মাৰণ ভাইৰাছ এইচ আই ভিত দেশত সংক্রমিত হৈছে ৮৫ হাজাৰতকৈ অধিক লোক৷ অসুৰক্ষিত যৌনতাৰ ফলত এই লোকসকল লকডাউনৰ সময়ত এইচ আই ভিৰ দ্বাৰা সংক্রমিত হোৱা বুলি ৰাষ্ট্রীয় এইডছ নিয়ন্ত্রণ সংস্থা (এনএচি’)ৰ তৰফৰ পৰা সদৰী কৰা হৈছে৷ এইক্ষেত্রত মহাৰাষ্ট্র শীর্ষস্থানত থকা বুলিও সংস্থাটোৰ তৰফৰ পৰা সদৰী কৰা হৈছে৷
স্মর্তব্য যে ক’ভিড মহামাৰীৰ সংক্রমণৰ তীব্রতা বৃদ্ধি পোৱাৰ লগে লগে ২০২০ চনৰ ২৫ মার্চত দেশজুৰি লকডাউন ঘোষণা কৰিছিল প্রধানমন্ত্রী নৰেন্দ্র মোদীয়ে৷ এক আৰ টি আইৰ তথ্য অনুসৰি, ক’ভিড মহামাৰীৰ লকডাউনৰ সময়ত মাৰণ ভাইৰাছ এইচ আই ভিয়ে ভয়াৱহ ৰূপ ধাৰণ কৰে দেশত৷ মহাৰাষ্ট্রত এই সময়ছোৱাত ১০,৪৯৮জন এইডছত আক্রান্ত হোৱাৰ উপৰি এই তালিকাত অন্ধ্রপ্রদেশ আৰু কর্ণাটক ক্রমে দ্বিতীয় আৰু তৃতীয় স্থানত আছে৷