নিয়মীয়া বাৰ্তা ১০ নৱেম্বৰঃ বলীউডত ড্রাগছৰ পয়োভৰ সন্দর্ভত তদন্ত চলাই থকা নার্ক’টিক্স কণ্ড্রোল ব্যুৰ’ (এন চি বি)এ অভিনেতা অর্জুন ৰামপালৰ মুম্বাইস্থিত বাসভৱনত অভিযান চলায়৷ বিগত মাহত অর্জুন ৰামপালৰ ভ্রাতৃৰ প্রেমিকাক এন চি বিয়ে ড্রাগছৰ গোচৰত গ্রেপ্তাৰ কৰাৰ পিছত আজি পুৱা অভিনেতাজনৰ মুম্বাইৰ বান্দ্রা, খাৰ আৰু আন্ধেৰীত থকা বাসভৱনত তালাচী চলায়৷ তালাচীৰ সময়ত অর্জুন ৰামপালৰ ড্রাইভাৰ এজনক এন চি বিয়ে আটক কৰে আৰু এন চি বিৰ কার্যালয়লৈ নিয়ে৷
কার্যালয়ত মাণ্ডলিক সঞ্চালক সমীৰ ৱানখেৰে আৰু তেওঁৰ দলে ড্রাইভাৰজনক ড্রাগছ সম্পর্কীয় বিভিন্ন তথ্যক লৈ সোধা–পোছা কৰে৷ উল্লেখ্য যে অর্জুন ৰামপালৰ বাসগৃহত এন চি বিয়ে তালাচী চলোৱাৰ পূর্বে কালি বলীউডৰ প্রখ্যাত চলচ্চিত্র নির্মাতা ফিৰোজ নাদিয়াদৱালাৰ বাসগৃহত অভিযান চলায়৷ এন চি বিয়ে চলোৱা এই অভিযানৰ সময়ত চলচ্চিত্র নির্মাতা নাদিয়াদৱালাৰ বাসগৃহৰ পৰা কিছু ড্রাগছ জব্দ কৰে৷ নাদিয়াদৱালাৰ পত্নী শ্বাৱনা ছয়ীদক এন চি বিয়ে কার্যালয়লৈ নি তাতেই শ্বাৱনাৰ স্বীকাৰোক্তি লিপিবদ্ধ কৰে৷ স্বীকাৰোক্তিৰ পিছতেই শ্বাৱনাক এন চি বিয়ে গ্রেপ্তাৰ কৰে৷
এন চি বিৰ সন্মুখত শ্বাৱনাই স্বীকাৰ কৰা মতে তেওঁৰ ইতিপূর্বে গ্রেপ্তাৰ কৰা কেইবাগৰাকীও ড্রাগছ সৰবৰাহকাৰীৰ সৈতে সম্পর্ক আছিল৷ এন চি বিয়ে অভিযান চলোৱাৰ সময়ত নির্মাতা নাদিয়াদৱালা বাসগৃহত উপস্থিত নাছিল৷ গতিকে তেওঁক চমন জাৰি কৰে সংস্থাটোৱে৷ নাদিয়াদৱালা এন চি বিৰ কার্যালয়ত হাজিৰ হয় আৰু এন চি বিৰ বিষয়াই সোধা–পোছা কৰে৷ উল্লেখ্য যে কিছুদিন সন্ধানহীন হৈ থকা অভিনেত্রী দীপিকা পাডুকনৰ প্রাক্তন মেনেজাৰ কৰিশ্মা প্রকাশ সোধা–পোছাৰ বাবে এন চি বিৰ কার্যালয়ত হাজিৰ হয়৷
ইতিপূর্বে দুবাৰকৈ তদন্তকাৰী সংস্থাটোৰ সন্মুখত হাজিৰ হোৱা কৰিশ্মা প্রকাশৰ বাসগৃহত কিছু পৰিমাণৰ ড্রাগছ জব্দ কৰিছিল৷ গুৰুত্বপূর্ণ যে প্রতিভাৱান অভিনেতা সুশান্ত সিং ৰাজপুতৰ ৰহস্যজনক মৃত্যুৰ তদন্ত চলাওঁতেই বলীউডৰ নামী–দামী অভিনেতা–ভিনেত্রী ড্রাগছ সেৱন কৰাৰ লগতে ড্রাগছৰ সৈতে জড়িত হৈ থকাৰ তথ্য এন চি বিয়ে লাভ কৰে৷ ইয়াৰ পিছতেই বলীউডত ড্রাগছৰ সৈতে জড়িত ব্যক্তিৰ বিৰুদ্ধে অনুসন্ধান ক্ষিপ্রতৰ কৰি তোলে এন চি বিয়ে৷