নিয়মীয়া বাৰ্তা, ২৭ ফেব্ৰুৱাৰীঃ জি এছ টি ব্যৱস্থাৰ পুনৰীক্ষণ আৰু ইন্ধনৰ দামবৃদ্ধিক লৈ কনফেডাৰেচন অৱ অল ইণ্ডিয়া ট্রেডার্ছে আহ্বান জনোৱা দিনজোৰা ভাৰত বন্ধৰ দেশজুৰি মিশ্রিত প্রভাৱ পৰে৷ দেশৰ ৰাজধানী দিল্লীৰ পৰা উত্তৰ–পূর্বাঞ্চলৰ ৰাজ্যসমূহত ট্রেডার্ছে আহ্বান জনোৱা বন্ধৰ সময়ত কিছু কিছু ব্যৱসায়িক প্রতিষ্ঠান বন্ধ থাকে যদিও অধিকাংশ দোকান–পোহাৰ খোলা থাকে৷ ওড়িশা, মধ্যপ্রদেশ, পঞ্জাব, হাৰিয়ানাকে ধৰি বিভিন্ন ৰাজ্যত এই বন্ধৰ প্রভাৱ সামান্যভাৱে পৰে৷
চি এ আই টিয়ে এই বন্ধত ৪০ হাজাৰতকৈ অধিক ব্যৱসায়িক সংগঠনে সমর্থন জনোৱা বুলি প্রকাশ কৰিছে যদিও কার্যতঃ বন্ধৰ সময়ছোৱাত তেনে প্রভাৱ প্রতিফলিত নহ’ল৷ ভাৰত বন্ধৰ প্রভাৱ মিশ্রিত হ’লেও ট্রেডার্ছৰ কর্মীসকলে দেশৰ ডেৰ হাজাৰতকৈ অধিক স্থানত জি এছ টি ব্যৱস্থা পুনৰীক্ষণৰ দাবীত ধর্ণা কার্যসূচী ৰূপায়ণ কৰে৷ আনহাতে, অল ইণ্ডিয়া ট্রেন্সপ’টার্ছ এছ’চিয়েচনে ভাৰত বন্ধৰ প্রতি সমর্থন জনায়৷
কালি চকাবন্ধ ঘোষণা কৰিছিল যদিও দেশজুৰি এই চকাবন্ধৰ প্রভাৱ বিশেষভাৱে পৰা পৰিলক্ষিত নহ’ল৷ ইন্ধনৰ দামবৃদ্ধি আৰু ই–ৱে বিল প্রত্যাহাৰৰ দাবীত অল ইণ্ডিয়া ট্রেন্সপ’টার্ছ এছ’চিয়েচনে দেশজুৰি চকাবন্ধ আৰু পথ অৱৰোধ কার্যসূচী ঘোষণা কৰিছিল৷ কিন্তু দেশজুৰি পথবন্ধৰ প্রভাৱ মিশ্রিত ৰূপত দেখা যায়৷ উল্লেখ্য যে বন্ধৰ কার্যসূচীক লৈ ব্যৱসায়ী সন্থাৰ মাজত মতভেদ হোৱা বাবে বন্ধৰ কার্যসূচী সর্বাত্মকভাৱে সফল নহ’ল৷