নিয়মীয়া বাৰ্তা ১০ জুলাইঃ বাংলাদেশৰ এক কাৰখানাত সংঘটিত শোকাৱহ অগ্ণিকাণ্ডৰ ঘটনাত ৫২গৰাকী লোকৰ মৃত্যু হোৱাৰ উপৰি অন্য ৩০গৰাকী গুৰুতৰভাৱে আহত হৈছে৷ দেশখনৰ জৰুৰী সেৱা বিভাগে সদৰী কৰিছে এই তথ্য৷ চৰকাৰী তথ্যত প্রকাশ পোৱা অনুসৰি কালি নিশা ৰাজধানী ঢ়াকাৰ সমীপৱর্তী ৰূপগঞ্জৰ হাছেম ফুড এণ্ড বেভাৰেজ ফেক্টৰীত সংঘটিত হয় এই অগ্ণিকাণ্ড৷
সংবাদ সংস্থা এ পি প্রতিবেদন অনুসৰি কাৰখানাটোত থকা ৰাসায়নিক সামগ্রী আৰু প্লাষ্টিকৰ বাবে কেইবাঘণ্টা ধৰি অগ্ণিকাণ্ড অব্যাহত থাকে৷ ইফালে, অগ্ণিনির্বাপক বাহিনীৰ এগৰাকী বিষয়ববীয়াই সংবাদ সংস্থা বিবিচিক জনোৱা অনুসৰি প্রাণ হেৰুওৱা লোকৰ সংখ্যা বৃদ্ধি পোৱাৰ আশংকা আছে৷ এতিয়াও কেইবাগৰাকীও কর্মী সন্ধানহীন হৈ থকা বুলি সদৰী কৰিছে বিষয়াগৰাকীয়ে৷ উল্লেখনীয় যে ৬ মহলীয়া কাৰখানাটোত ফলৰ ৰস, নুডল আৰু বিভিন্ন মিঠাই প্রস্তুত কৰা হৈছিল৷ এই বাতৰি যুগুতোৱাৰ পৰলৈ ইয়াৰ অভ্যন্তৰত শতাধিক লোক আবদ্ধ হৈ আছে৷