🔹 ভাৰতীয় সেনা–আৰক্ষীৰ সফল অভিযান : ২ জোৱান আহত
নিউজ ডেস্ক, ২০ ডিচেম্বৰ : জম্মু–কাশ্মীৰৰ কুলগাম জিলাত কালি নিৰাপত্তা বাহিনীৰে সংঘর্ষত নিহত হৈছে পাঁচটা দুৰ্ধৰ্ষ সন্ত্রাসবাদী৷ এই সংঘর্ষৰ ঘটনাত দুজন জোৱানো আহত হৈছে৷ আত্মগোপন কৰি থকা সন্ত্রাসবাদীৰ বিৰুদ্ধে তালাচী অভিযান চলোৱাৰ সময়তে উভয়পক্ষৰ মাজত চলে তুমুল গুলীয়াগুলী৷ কালি পুৱাৰ ভাগতে সংঘটিত হৈছে এই সংঘর্ষৰ ঘটনা৷ সংঘর্ষৰ পিছত ভাৰতীয় সেনাৰ তৰফৰ পৰা এক্স হেণ্ডেলত সদৰী কৰা অনুসৰি, দক্ষিণ কাশ্মীৰৰ কুলগামৰ কাড্ডেৰ অঞ্চলত জেহাদীয়ে আত্মগোপন কৰি থকাৰ তথ্য লাভ কৰিছিল চোৰাংচোৱা সূত্রৰ পৰা৷ ইয়াৰ পিছতে পুৱা সেনা আৰু আৰক্ষীৰ যৌথ বাহিনীয়ে অঞ্চলটোত তালাচী অভিযান আৰম্ভ কৰে৷ সন্দেহজনক স্থানত সন্ত্রাসবাদীৰ গতিবিধি নজৰলৈ অহাৰ লগে লগে নিৰাপত্তা বাহিনীয়ে আৰম্ভ কৰে গুলীচালনা৷ এই গুলীৰ প্রত্যুত্তৰ দিয়ে সন্ত্রাসবাদীয়ে৷ কেইবাঘণ্টাও উভয়পক্ষৰ মাজত চলে গুলীচালনাৰ ঘটনা৷ এই সংঘর্ষৰ ঘটনাত পাঁচটা সন্ত্রাসবাদী নিহত হোৱা বুলি নিশ্চিত কৰিছে সেনাই৷ অন্য কেইবাটাও সন্ত্রাসবাদীয়ে ঘটনাস্থলীৰ পৰা পলায়ন কৰে৷ বাতৰি যুগুতোৱা পৰলৈ অঞ্চলটোত অভিযান অব্যাহত আছে৷