এইচ–৪ ৱর্ক পার্মিট প্রত্যাহাৰ মার্কিন ৰাষ্ট্রপতি জ’ বাইডেনৰ

নিয়মীয়া বাৰ্তা ২৮ জানুৱাৰীঃ আমেৰিকা যুক্তৰাষ্ট্রৰ ৰাষ্ট্রপতি জ’ বাইডেনে প্রতিশ্রুতি মতেই পূর্বৰ ৰাষ্ট্রপতি ড’নাল্ড ট্রাম্পৰ বিতর্কিত ইমিগ্রেচন নীতি পৰিৱর্তন ঘটালে৷ ট্রাম্প প্রশাসনে বলৱৎ কৰা এইচ–৪ ৱর্ক পার্মিট প্রত্যাহাৰ কৰিলে ৰাষ্ট্রপতি বাইডেনে৷ মার্কিন ৰাষ্ট্রপতিগৰাকীৰ এই পদক্ষেপৰ বাবে প্রবাসী ভাৰতীয়সকল লাভান্বিত হ’ব৷ এক কথাত ভাৰতীয়লৈ সকাহ দিলে ৰাষ্ট্রপতিগৰাকীয়ে৷ ট্রাম্প প্রশাসনৰ নীতি অনুসৰি এইচ–১বি ভিছাপ্রাপ্ত লোকৰ পৰিয়াল কিম্বা পত্নীয়ে আমেৰিকাত বসবাস কৰাৰ ক্ষেত্রত বিভিন্ন সমস্যাৰ সৃষ্টি কৰাটো নিশ্চিত আছিল৷ ৰাষ্ট্রপতি বাইডেনে এইচ–৪ ৱর্ক  পার্মিট প্রত্যাহাৰ কৰাৰ লগে লগে এইচ–১বি ভিছাপ্রাপ্ত বিদেশী লোকসকলৰ পৰিয়াললৈ সকাহ৷ এইক্ষেত্রত সর্বাধিক লাভান্বিত হ’ব আমেৰিকা যুক্তৰাষ্ট্রত এইচ–১বি ভিছা লৈ কর্মসূত্রে বসবাস কৰি থকা ভাৰতীয়সকল৷ ভাৰতৰ উপৰি চীনৰ প্রবাসী লোকসকলো লাভান্বিত হ’ব৷ উল্লেখ্য যে ২০১৭ চনত মার্কিন ৰাষ্ট্রপতি বাৰাক অ’বামাৰ কার্যকালত বলৱৎ থকা ইমিগ্রেচন নীতিক দায়িত্ব লৈয়ে ৰাষ্ট্রপতি ড’নাল্ড ট্রাম্পে সালসলনি ঘটাইছে৷ এইচ–৪ ৱর্ক পার্মিট লৈ কর্মৰত লোকসকলক হেঁচা প্রয়োগ কৰা হৈছে৷ ট্রাম্পৰ কার্যকালত এনে হেঁচাৰ বাবে প্রবাসী ভাৰতীয়সকল সংকটত পৰে৷