নিয়মীয়া বাৰ্তা ২২ ফেব্ৰুৱাৰীঃ পূব লাডাখত সংঘটিত উত্তেজনাৰ অৱসান ঘটাবলৈ কালি ভাৰত–চীনৰ সেনা বিষয়া পর্যায়ৰ দশমলানি বৈঠক অনুষ্ঠিত হয়৷ এই দশমলানি বৈঠক সুদীর্ঘ ১৬ ঘণ্টা ধৰি চলে৷ উভয় পক্ষৰ জ্যেষ্ঠ কমাণ্ডাৰসকলে লাডাখৰ হটস্প্রিংছ, গোগৰা আৰু ডেপছাং পইণ্টৰ পৰা সেনাৰ পশ্চাদপসৰণৰ বিষয়টো সন্দর্ভত সহমত পোষণ কৰিছে৷ কালিৰ এই আলোচনাৰ পিছতে আজি প্রতিৰক্ষা মন্ত্রালয়ে প্রকাশ কৰিছে এক বিবৃতি৷
স্মর্তব্য যে দশমলানি এই আলোচনাত ভাৰতীয় পক্ষক নেতৃত্ব প্রদান কৰিছিল লেফটেনেণ্ট জেনেৰেল পিজিকে মেননে৷ পিজিকে মেনন হৈছে লেখস্থিত ১৪ ক’পছৰ কমাণ্ডাৰ৷ ইফালে চীনা পক্ষক নেতৃত্ব প্রদান কৰিছিল মেজৰ জেনেৰেল লিউ লিনে৷ প্রতিৰক্ষা মন্ত্রালয়ে প্রকাশ কৰা বিবৃতি অনুসৰি মলডো–চাছাল সীমান্তৰ বৈঠকত উভয় পক্ষই ইতিবাচক দৃষ্টিভংগীৰে পাংগং লেকৰ সমীপৰ পৰা সেনাৰ পশ্চাদপসৰণৰ বিষয়টোৰ সহমত পোষণ কৰিছে৷
লক্ষণীয়ভাৱে দশমলানি আলোচনাক প্রতিৰক্ষা মন্ত্রালয়ে বিভিন্ন দিশৰ পৰা তাৎপর্যপূর্ণ বুলি অভিহিত কৰিছে৷ এই ইতিবাচক দৃষ্টিভংগীৰ আলোচনাৰ বাবে ভৱিষ্যৎ দিনত সামৰিক বিষয়া পর্যায়ত এল এ চি সন্দর্ভত প্রস্তাৱ গ্রহণ কৰিব পৰা যাব বুলিও আশা প্রকাশ কৰা হৈছে বিবৃতিটোত৷ উভয় পক্ষৰ সেনা বিষয়াই সীমান্ত অঞ্চলত যৌথভাৱে শান্তি আৰু সুস্থিৰতা ৰক্ষাৰ বিষয়টোতো সহমত পোষণ কৰা বুলি প্রতিৰক্ষা মন্ত্রালয়ৰ বিবৃতিত উল্লেখ কৰা হৈছে৷ অৱশ্যে তাৎক্ষণিকভাৱে বেইজিং প্রশাসনে এই সন্দর্ভত কোনো বিবৃতি প্রকাশ কৰা পৰিলক্ষিত হোৱা নাই৷