জুলাইলৈ পাকিস্তানত আক্রান্তৰ সংখ্যা হ’ব ১.২ মিলিয়ন

নিয়মীয়া বাৰ্তা ১৬ জুনঃ মহামাৰী ক’ৰোনা ভাইৰাছৰ ভয়াৱহ সংক্রমণে চুবুৰীয়া ৰাষ্ট্র পাকিস্তানত ক্রমাৎ জটিল ৰূপ ধাৰণ কৰিছে৷ শেহতীয়াকৈ দেশখনত ২৪ ঘণ্টাত মুঠ ৫,২৪৮গৰাকী নতুন ব্যক্তি ক’ভিড–১৯ত আক্রান্ত হৈছে৷ ইয়াকে ধৰি পাকিস্তানত মুঠ আক্রান্তৰ সংখ্যা ১,৪৪,৬৭৬ লৈ বৃদ্ধি পোৱা দেখা গৈছে৷ ৰাষ্ট্রীয় স্বাস্থ্যসেৱা মন্ত্রালয়ৰ তথ্য অনুসৰি যোৱা ২৪ ঘণ্টাত ৩০ হাজাৰ লোকৰ ক’ভিড–১৯ টেষ্ট সম্পন্ন হৈছে আৰু ইয়াকে ধৰি মুঠ টেষ্টৰ সংখ্যা ৮,৯৭,৬৫০লৈ বৃদ্ধি পাইছে৷ মৃত্যু হোৱা লোকৰ সংখ্যাও শেহতীয়াকৈ যথেষ্ট পৰিমাণে বৃদ্ধি হোৱা দেখা গৈছে৷ স্বাস্থ্য মন্ত্রালয়ে সদৰী কৰা মতে, যোৱা ২৪ ঘণ্টাত দেশখনত মুঠ ৯৭জন লোক মহামাৰী ক’ৰোনা ভাইৰাছত আক্রান্ত হৈ মৃত্যুমুখত পৰিছে৷ সামগ্রিকভাৱে দেশখনত এতিয়ালৈকে ক’ৰোনাত মৃত্যু হোৱা লোকৰ সংখ্যা হ’ল ২,৭২৯গৰাকী৷ অৱশ্যে ইয়াৰ মাজতে আশাৰ বতৰাটো হ’ল যে দেশখনত প্রায় ৫৩ হাজাৰ ব্যক্তিয়ে ক’ৰোনা ভাইৰাছৰ পৰা আৰোগ্য লাভ কৰিছে৷ ইফালে, দেশখনৰ পৰিকল্পনামন্ত্রী আছাদ ওমৰে আজি আশংকা প্রকাশ কৰিছে যে এইধৰণে দেশখনত ক’ৰোনাৰ প্রকোপ বৃদ্ধি পাই থাকিলে জুলাইৰ শেষলৈ পাকিস্তানত মুঠ আক্রান্তৰ সংখ্যা ১.২ মিলিয়ন স্পর্শ কৰিব৷ মন কৰিবলগীয়া যে মহামাৰী ক’ৰোনা ভাইৰাছে এতিয়ালৈকে বিশ্বত প্রায় ৭৯,০০,০০০ ব্যক্তিক আক্রমণ কৰিছে আৰু এই মহামাৰীৰ ফলত ৪,৩০,০০০ ব্যক্তি মৃত্যুমুখত পৰিছে৷ আমেৰিকা যুক্তৰাষ্ট্র হ’ল ক’ৰোনাই সর্বাধিক ক্ষতি কৰা দেশ৷ বিশ্বৰ সবাতোকৈ শক্তিশালী দেশখনক একপ্রকাৰ বিধ্বস্ত কৰি ক’ৰোনাই প্রায় ২.০৯ মিলিয়ন ব্যক্তিক আক্রান্ত কৰিছে৷