নিয়মীয়া বার্তা, ২৯ জুনঃ লাডাখত চীনা সৈন্যৰ আক্রমণত ২০ ভাৰতীয় জোৱান শ্বহীদ হোৱাৰ ঘটনাৰ প্রতিবাদকল্পে কলকাতাত খাদ্য যোগানকাৰী কোম্পানী জমাট’ৰ একাংশ কর্মচাৰীয়ে কোম্পানীৰ টি ছার্ট জ্বলালে৷ চীনৰ বিনিয়োগ থকা জমাট’ কোম্পানীটোৰ কেইবাগৰাকী কর্মচাৰীয়ে চাকৰি ত্যাগ কৰাৰ লগতে কোম্পানীটোৰ টি ছার্ট জ্বলাই দিয়ে৷
চীনা সামগ্রী বর্জনৰ আন্দোলনত অংশ লৈ কর্মচাৰীকেইজনে দেশৰ নাগৰিকক কোম্পানীটোত খাদ্যৰ অর্ডাৰ নিদিবলৈ আহ্বান জনাইছে৷ উল্লেখ্য যে চীনৰ আলিবাবাই জমাট’ত ২১০ নিযুত মার্কিন ডলাৰ বিনিয়োগ কৰি কোম্পানীটোৰ ১৪.৭ শতাংশ শ্বেয়াৰ ক্রয় কৰিছিল৷ তাৎপর্যপূর্ণ যে যোৱা মে’ মাহত জমাট’ৱে ক’ভিড–১৯ৰ সংকটৰ বাবে ১৩ শতাংশ কর্মচাৰীক চাটাই কৰিছিল৷ ইয়াৰ বিপৰীতে প্রতিবাদী সত্তাৰে একাংশ কর্মচাৰীয়ে চাকৰি ত্যাগ কৰাটো তাৎপর্যপূর্ণ৷