এলএচিত অত্যাধুনিক ইউএভিৰে চীনৰ নিৰীক্ষণ

নিয়মীয়া বাৰ্তা ২৫ মেঃ দুর্গম মালভূমিসমূহত অভিযানৰ সক্ষমতা থকা মানৱবিহীন আকাশমার্গেৰে চলোৱা বাহন (ইউএভি) চীনে নির্মাণ কৰি উলিয়াইছে৷ এই ইউএভি শেহতীয়াকৈ কৈলাস পার্বত্য অঞ্চলত ভাৰতৰ সৈতে থকা সীমান্তৰ প্রকৃত নিয়ন্ত্রণ ৰেখা (এলএচি)ৰ নিৰীক্ষণৰ বাবে মোতায়েন কৰাৰ আঁচনি গ্রহণ কৰিছে চীনে৷ শেহতীয়াকৈ কেইবাটাও বিশ্বস্ত সূত্রই এই তথ্য সদৰী কৰিছে৷ দেশখনৰ ছানঝি অঞ্চলত এই অতি শক্তিসম্পন্ন অত্যাধুনিক ইউএভি নির্মাণ কৰা হৈছে৷ তিব্বত স্বায়ত্তশাসিত অঞ্চলৰ গাৰ গুনছাত ইতিমধ্যে ইয়াৰ প্রথমটো উৰণ সফলতাৰে সম্পূর্ণ কৰিছে চীনে৷

হাইলান উৰণ গোটৰ নিয়ন্ত্রণত আছে এই ইউএভি তথা মানৱবিহীন হেলিকপটাৰ৷ ৪,৭০০ মিটাৰ দূৰত্ব অতিক্রম কৰাৰ পিছত বাগা চহৰত ই অৱতৰণ কৰিছিল৷ কৈলাস পার্বত্য অঞ্চলত এতিয়া এলএচিৰ নিৰীক্ষণ তথা বিভিন্ন তালাচী অভিযানত এই ইউএভি হ’ব পাৰে চীনৰ অতি গুৰুত্বপূর্ণ অস্ত্র৷ কৈলাস পার্বত্য অঞ্চলজুৰি আছে পাংগং ছোৰ, দক্ষিণ প্রান্তৰ পৰা উত্তৰ–পশ্চিম আৰু দক্ষিণ–পূবৰ ৬০ কিলোমিটাৰলৈকে৷ স্মর্তব্য যে যোৱা বছৰ মে’ মাহত এলএচিত ভাৰত–চীনৰ সেনাৰ মাজত সৃষ্টি হোৱা উত্তেজনাৰ সময়ত এই কৈলাস পার্বত্য অঞ্চল উভয় দেশৰ বাবে এক ষ্ট্রেটেজিক পইণ্ট হিচাপে চিহ্ণিত হৈছিল৷ এই অত্যাধুনিক ইউএভি যদি অঞ্চলটোত চীনে মোতায়েন কৰে, তেতিয়াহ’লে স্থলপথৰ দুর্গম যাতায়াতৰ সমস্যা দূৰ হ’ব৷