নিয়মীয়া বাৰ্তা, ২৯ নৱেম্বৰঃ দখলদাৰী চীনক এক ইঞ্চিও ভূমি এৰি নিদিয়াৰ হুংকাৰেৰে লাডাখ সীমান্তত যুদ্ধংদেহি মনোভাব লৈ ভাৰতে আন এক পদক্ষেপ ল’লে৷ লাডাখৰ এল এ চি সংলগ্ন পাংগং হ্রদত নতুনকৈ মোতায়েন কৰিলে মার্ক’ছ কমাণ্ডো৷ মেৰাইন কমাণ্ডোৱে (মার্ক’ছ) এতিয়াৰে পৰা পাংগং হ্রদত ভাৰতীয় বায়ুসেনা বাহিনীৰ গৰুড় আৰু স্থলসেনাৰ পেৰা স্পেচিয়েল ফ’চৰ সৈতে মিলিত হৈ সীমান্তৰ নিৰীক্ষণত থাকিব৷
দেশৰ তিনি সেনাবাহিনীক একত্রিত কৰি সীমান্তৰ নিৰীক্ষণৰ দায়িত্ব প্রদান কৰাৰ বাবে লাডাখৰ পূব প্রান্তত মার্ক’ছ কমাণ্ডো মোতায়েন কৰা হৈছে৷ উল্লেখ্য যে লাডাখৰ এল এ চিত যোৱা এপ্রিল–মে’ মাহৰ পৰা বর্তমানলৈকে চীনা সৈন্যৰ সৈতে উত্তেজনা অব্যাহত থকাৰ প্রতি লক্ষ্য ৰাখি এই পদক্ষেপ গ্রহণ কৰা হৈছে বুলি চৰকাৰী সূত্রত প্রকাশ পাইছে৷ নতুনকৈ মোতায়েন কৰা কমাণ্ডোক সেনাই নতুন প্রযুক্তিৰ নাও ব্যৱহাৰৰ বাবে প্রদান কৰিব৷
ইতিমধ্যে হ্রদত নিৰাপত্তাৰ বাবে পূর্বৰ আন্তঃগাঁথনি উন্নীত কৰা হৈছে৷ দীর্ঘদিন ধৰি এই অঞ্চলটোত স্থলসেনাৰ পেৰা স্পেচিয়েল ফ’চ আৰু কেবিনেট ছেক্রেটৰিয়েট স্পেচিয়েল ফ্রণ্টিয়ার্ছ ফ’র্চে দায়িত্ব চম্ভালি আহিছে৷ চীনৰ আগ্রাসনৰ প্রতি লক্ষ্য ৰাখি নতুন দিল্লীয়ে উল্লিখিত সেনাৰ দলক শক্তিশালী কৰাৰ বাবে মার্ক’ছ কমাণ্ডো মোতায়েন কৰে৷ এল এ চিত সংলগ্ন পর্বতৰ শিখৰৰ ষ্ট্রেটেজিক হেইটত বায়ুসেনাৰ গৰুড় স্পেচিয়েল ফ’চ মোতায়েন হৈ আছে৷
উল্লেখ্য যে চুবুৰীয়া ৰাষ্ট্রখনে এল এ চিৰ সিপাৰে বিশেষ সেনা মোতায়েন কৰাৰ পৰিপ্রেক্ষিততেই নতুন দিল্লীয়েও সেনাক শক্তিশালীকৰণৰ প্রক্রিয়া হিচাপে মার্ক’ছ কমাণ্ডো মোতায়েন কৰিলে৷ উনুকিয়াব লাগিব যে ২০১৬ চনৰ পাঠানকোঠত আক্রমণৰ পাছতেই কাশ্মীৰ উপত্যকাত গৰুড় বিশেষ ফ’চ মোতায়েন কৰা হৈছিল৷ সেই সময়ত সেনাৰ মুৰব্বী আছিল জেনেৰেল বিপিন ৰাৱাট৷ বর্তমান দেশৰ চি ডি এছ হিচাপে জেনেৰেল বিপিন ৰাৱাটে কার্যনির্বাহ কৰি আছে৷