ৰাজ্যসভা সাংসদৰ ২৪ শতাংশৰ আছে অপৰাধমূলক গোচৰ

নিয়মীয়া বাৰ্তা ২৩ জুলাইঃ   ৰাজনীতি অপৰাধীমুক্তকৰণ দেশত শ্লোগান হৈ আছে৷ দেশৰ ৰাজনৈতিক দলসমূহে ৰাজনীতিক অপৰাধীমুক্তকৰণৰ পোষকতা কৰে যদিও কার্যতঃ ইয়াৰ বিপৰীত ছবি এখন প্রতিফলিত হয়৷ ৰাজ্যসভাৰ সাংসদসকলৰ স্ব–ঘোষিত শপতনামাৰ আধাৰত এছ’চিয়েচন ফৰ ডেম’ক্রেটিক ৰিফর্মছ (এডিআৰ)–এ প্রস্তুত কৰা শেহতীয়া প্রতিবেদনত ৰাজনীতিত অপৰাধীৰ সবল স্থিতি স্পষ্ট হৈ পৰিছে৷ এডিআৰৰ প্রতিবেদন মতে, ৰাজ্যসভাত ২৪ শতাংশ সাংসদৰ আছে অপৰাধমূলক গোচৰ৷ ইয়াৰে ১২ শতাংশৰ বিৰুদ্ধে আছে গুৰুতৰ অপৰাধমূলক গোচৰ৷ তথ্য মতে, ২২৯জন ৰাজ্যসভাৰ সাংসদৰ ভিতৰত ৫৪গৰাকীৰ আছে বিভিন্ন অপৰাধমূলক গোচৰ৷ ইয়াৰে ২৮জন অর্থাৎ ১২ শতাংশৰ অপৰাধ গুৰুতৰ৷ প্রতিবেদন মতে, ৭৭গৰাকী বিজেপি সাংসদৰ ভিতৰত ১৪গৰাকী আৰু ৪০গৰাকী কংগ্রেছ সাংসদৰ ভিতৰত ৮গৰাকীৰ বিৰুদ্ধে অপৰাধমূলক গোচৰ আছে৷ তিনিখন আসন খালী হৈ থকাৰ বিপৰীতে কেৰালাৰ সাংসদ কে কে ৰাগেছৰ শপতনামা এই প্রতিবেদনত সন্নিৱিষ্ট হোৱা নাই৷ আনহাতে, ২০৩গৰাকী সাংসদ তথা ৮৯ শতাংশ সাংসদৰ সম্পত্তিৰ মূল্য ১ কোটিতকৈ অধিক৷ ৪,০৭৮ কোটি টকাৰ সম্পত্তিৰে বিহাৰৰ জে ডি ইউৰ সাংসদ মহেন্দ্র প্রসাদ শীর্ষত আছে৷