🔹 মুম্বাইৰ সিদ্ধি বিনায়ক মন্দিৰৰ অভিলেখ
নিউজ ডেস্ক, ৩ এপ্রিল : এবছৰত ১৩৩ কোটি টকা উপার্জন! নতুন অভিলেখ গঢ়িলে মুম্বাইৰ সিদ্ধি বিনায়ক মন্দিৰে৷ অকল সেয়াই নহয়, আগন্তুক বিত্তীয় বর্ষত এই বিখ্যাত মন্দিৰৰ আয়ৰ অংকই ডেৰশ কোটি অতিক্রম কৰি যাব বুলি ধাৰণা কৰিছে বিশেষজ্ঞসকলে৷ মন্দিৰৰ বিপুল আর্থিক উপার্জনৰ নেপথ্যত আছে কর্তৃপক্ষৰ পৰিচালনা৷ সিদ্ধি বিনায়ক মন্দিৰত উপ–কার্যবাহী বিষয়া সন্দীপ ৰাথোড়ে এই মন্তব্য কৰিছে৷ ৩১ মার্চত শেষ হৈছে বিত্তীয় বর্ষ৷ ২০২৪–২৫ চনৰ হিচাপ অনুসৰি বিভিন্ন শিতানত মুম্বাইৰ এই বিখ্যাত মন্দিৰে উপার্জন কৰিছে ১৩৩ কোটি টকা৷ বিত্তীয় বর্ষটোৰ আৰম্ভণিতে অনুমান কৰা হৈছিল যে ১১৪ কোটি টকা উপার্জন কৰিব পাৰে৷ কিন্তু প্রত্যাশাতকৈও বেছি দান দিছে ভক্তসকলে৷ অর্থাৎ ধাৰণা কৰাতকৈ ১৫ শতাংশ বেছি অৰিহণা লাভ কৰিছে সিদ্ধি বিনায়ক মন্দিৰে৷ গতিকে আগন্তুক বর্ষটোত উপার্জনৰ ধন ডেৰশ কোটি বা তাতকৈ বেছি হ’ব পাৰে বুলি আশা কৰা হৈছে৷ লক্ষণীয় বিষয়টো হৈছে সু–পৰিচালনাৰ বাবে বিগত বিত্তীয় বর্ষত সিদ্ধি বিনায়ক মন্দিৰ দর্শন কৰা ভক্তৰ সংখ্যা অভাৱনীয়ভাৱে বৃদ্ধি পাইছিল৷ গতিকে আশা কৰাতকৈ বহু বেছি দান–বৰঙণি মন্দিৰটোৰ কোষাগাৰত সংগ্রহ হৈছে৷ দর্শনার্থীসকলক মন্দিৰ দর্শনৰ ক্ষেত্রত সুযোগ–সুবিধা প্রদান কৰিলে দর্শনার্থীৰ ভিৰ বৃদ্ধি পোৱাটো স্বাভাৱিক৷ ইফালে, বিগত বিত্তীয় বর্ষটোত দেশৰ বাহিৰৰ পৰা অহা বহু ভক্তই মন্দিৰটো দর্শন কৰি বিপুল পৰিমাণৰ অৰিহণা আগবঢ়াইছিল বুলিও মন্দিৰ কর্তৃপক্ষই সদৰী কৰিছে৷