নিয়মীয়া বাৰ্তা ৫ ছেপ্টেম্বৰঃ চিবিআয়ে তদন্ত অব্যাহত ৰখা বলীউড অভিনেতা সুশান্ত সিং ৰাজপুতৰ ৰহস্যজনক হত্যাৰ গোচৰত ড্রাগ্ছক লৈও তদন্ত চলিছে৷ হত্যাৰ গোচৰত ড্রাগ্ছ জড়িত হৈ পৰাৰ পিছতে নার্ক’টিকছ কণ্ড্র’ল ব্যুৰ’ (এনচিবি)–এ তদন্ত ক্ষিপ্রতৰ কৰি তুলিছে৷ ইতিমধ্যে এনচিবিয়ে অভিনেতা সুশান্তৰ প্রেয়সী ৰিয়া চক্রৱর্তীৰ বিৰুদ্ধে ড্রাগ্ছ সম্পর্কীয় অপৰাধমূলক গোচৰ ৰুজু কৰিছে৷ মুম্বাইৰ ড্রাগ্ছ মাফিয়াৰ সৈতে ৰিয়া চক্রৱর্তী আৰু ৰিয়াৰ ভাতৃ সৌৱিক চক্রৱর্তী জড়িত হোৱাৰ তথ্য ধৃত ড্রাগ্ছ মাফিয়াৰ স্বীকাৰোক্তিত ওলাই পৰাৰ পিছতে শুকুৰবাৰে পুৱা ৬ বজাতে এনচিবিৰ ৬টা দলে ৰিয়া চক্রৱর্তীৰ বাসভৱনত তালাচী চলায়৷ ইয়াৰ সমান্তৰালকৈ অভিনেতা সুশান্তৰ পূর্বৰ গৃহ মেনেজাৰ ছেমুৱেল মিৰাণ্ডাৰ বাসগৃহতো তালাচী চলায় এনচিবিয়ে৷ ৰিয়া চক্রৱর্তীৰ বাসভৱনত কেইবাঘণ্টা ধৰি তালাচী চলোৱা এনচিবিয়ে ৰিয়াৰ ম’বাইল, লেপটপকে ধৰি বিভিন্ন নিৰীক্ষণ কৰাৰ লগতে বাহনতো তালাচী চলায়৷ কেইবাঘণ্টা ধৰি ৰিয়াৰ লগতে ভাতৃ সৌৱিকক সোধা–পোছা কৰাৰ অন্তত এনচিবিয়ে সৌৱিকক আটক কৰি কার্যালয়লৈ লৈ আনে৷ ইপিনে, ছেমুৱেল মিৰাণ্ডাৰ বাসভৱনত পুৱাই অভিযান চলোৱা এনচিবি দলে ঘৰৰ ভিতৰত তন্নতন্নকৈ অভিযান চলোৱাৰ অন্তত মিৰাণ্ডাকো সোধা–পোছাৰ বাবে আটক কৰি আনে৷ এনচিবিয়ে কার্যালয়ৰ সৌৱিক আৰু মিৰাণ্ডাক কেইবাঘণ্টা ধৰি সোধা–পোছাৰ অন্তত সন্ধিয়া গ্রেপ্তাৰ কৰে৷ ৰাষ্ট্রীয় সংবাদ মাধ্যমত প্রকাশিত তথ্য অনুসৰি ৰিয়া চক্রৱর্তীৰ বাসগৃহত এনচিবিৰ আঠজন বিষয়া আৰু মুম্বাই আৰক্ষীয়ে অভিযান চলায়৷ ড্রাগ্ছ মাফিয়াৰ সৈতে ৰিয়া চক্রৱর্তীৰ হোৱাটছএপ বার্তাৰ আধাৰতেই এই অভিযান চলোৱা হয়৷ মন কৰিবলগীয়া যে ইয়াৰ পূর্বে এনচিবিয়ে চমন জাৰি কৰি ৰিয়া, সৌৱিক আৰু মিৰাণ্ডাক সোধা–পোছা কৰিছিল যদিও প্রথমবাৰৰ বাবে কোনো খবৰ নকৰাকৈ পুৱাতেই বাসগৃহত উপস্থিত হৈ তালাচী অভিযান চলায়৷ উল্লেখ্য যে কালি এনচিবিয়ে কাইজান ইব্রাহিম নামৰ ড্রাগ্ছ মাফিয়া এটাক গ্রেপ্তাৰ কৰাৰ পিছতেই এনচিবিয়ে ৰিয়াৰ বাসভৱনত তালাচী চলায়৷ ইয়াৰ পূর্বে এনচিবিয়ে আবদেল বছিট পৰিহাৰ নামৰ ড্রাগ্ছ মাফিয়া এটাক গ্রেপ্তাৰ কৰি পৰিহাৰৰ স্বীকাৰোক্তিৰ ভিত্তিতেই অভিযান চলাই ইব্রাহিমক গ্রেপ্তাৰ কৰিছিল৷ এই দুই ড্রাগ্ছ মাফ্রিয়াৰ উপৰি এন চি বিয়ে জাইড বিলাট্টা নামৰ মাফিয়া এজনক গ্রেপ্তাৰ কৰিছে৷ অভিনেতা সুশান্তৰ মৃত্যুৰ গোচৰৰ তদন্ত ড্রাগ্ছলৈ প্রসাৰিত হোৱাত এনচিবিয়ে মুম্বাইৰ ড্রাগ্ছ মাফিয়াসকলক সূক্ষ্ম নিৰীক্ষণত ৰাখিছে৷ এই সূক্ষ্ম নিৰীক্ষণৰ বাবেই ইতিমধ্যে তিনিটাকৈ কুখ্যাত ড্রাগ্ছ মাফিয়াক গ্রেপ্তাৰ কৰিছে৷ ৰিয়াৰ ভাতৃ সৌৱিক চক্রৱর্তী কিদৰে ড্রাগ্ছ মাফিয়াৰ সৈতে জড়িত হৈ পৰিছিল, সেয়াও পোহৰলৈ আহিছে৷ মুম্বাইৰ বান্দ্রাত ফুটবল ক্লাব এটাত প্রথমে সাক্ষাৎ হোৱাৰ পিছতেই সৌৱিক আৰু ড্রাগ্ছ মাফিয়া পৰিহাৰৰ সম্পর্ক গভীৰ হৈ পৰে৷ বিগত দুবছৰ ধৰি ড্রাগ্ছ মাফিয়া পৰিহাৰৰ সৈতে সম্পর্ক ৰক্ষা কৰি চলা সৌৱিকৰ বাসভৱনত সঘনে আহিছিল পৰিহাৰ৷ তেনেদৰে দুয়োৰে মাজত ড্রাগ্ছৰ লেনদেন হৈছিল৷ পৰিহাৰে ৰিয়াৰ ভাতৃ সৌৱিকক ড্রাগ্ছ যোগান ধৰাৰ পিছত এই ড্রাগ্ছ পাছলৈ চলচ্চিত্র জগতৰ বিভিন্নজনলৈ বিয়পি পৰে৷ বান্দ্রাৰ বাৰ এখনৰ সৈতে জড়িত ড্রাগ্ছ মাফিয়া কাইজান ইব্রাহিমৰ সৈতেও ড্রাগ্ছক লৈয়ে সম্পর্ক গঢ়ি উঠে সৌৱিকৰ৷ এনচিবিয়ে গ্রেপ্তাৰ কৰা এই তিনি ড্রাগ্ছ মাফিয়াই বলীউডৰ হাইপ্রফাইল পার্টীত অংশগ্রহণ কৰাৰ লগতে চেলিব্রিটীৰ সন্তানক ড্রাগ্ছ যোগান ধৰে বুলিও বিভিন্ন তথ্য এনচিবিৰ জেৰাত ওলাই পৰিছে৷