নিয়মীয়া বাৰ্তা ৩ ছেপ্টেম্বৰঃ অভিনেতা সুশান্ত সিং ৰাজপুতৰ ৰহস্যজনক মৃত্যুৰ ঘটনাৰ তদন্তই শেহতীয়াভাৱে ড্রাগ্ছৰ লগত জড়িত হৈ পৰিছে৷ তদন্তকাৰী সংস্থা চি বি আয়ে অভিনেতা সুশান্তৰ গার্ল ফ্রেণ্ড ৰিয়া চক্রৱর্তী, ৰিয়াৰ ভাতৃ সৌৱিক, পিতৃ–মাতৃকে ধৰি অভিনেতাগৰাকীৰ বন্ধু, ৰান্ধনী আৰু ঘৰুৱা সহায়কক উপর্যুপৰি জেৰা কৰি থকাৰ সমান্তৰালকৈ এই ৰহস্যজনক মৃত্যুৰ ঘটনাত সাঙোৰ খাই পৰা ড্রাগ্ছক লৈও তদন্ত চলাই আছে নাৰকটিছ কণ্ড্র’ল ব্যুৰ’ৱে (এন চি বি)৷ এন চি বিয়ে গ্রেপ্তাৰ কৰা মুম্বাইৰ কুখ্যাত ড্রাগ্ছ ব্যৱসায়ীৰ সৈতে ৰিয়াৰ ভাতৃ সৌৱিকৰ সম্পর্কৰ তথ্য লাভ কৰিছে৷ ইতিমধ্যে এন চি বিয়ে ৰিয়া চক্রৱর্তী আৰু ভাতৃ সৌৱিকৰ বিৰুদ্ধে অপৰাধমূলক গোচৰ ৰুজু কৰিছে৷ এই গোচৰৰ তদন্ত চলাই থকা এন চি বিয়ে শীঘ্রেই ৰিয়াৰ ভাতৃ সৌৱিক আৰু অভিনেতা সুশান্তৰ বাসগৃহৰ মেনেজাৰক চমন জাৰি কৰিব৷ উল্লেখ্য যে অভিনেতা ৰাজপুতৰ মৃত্যুৰ লগত ড্রাগ্ছ মাফিয়া জড়িত হোৱাৰ সম্ভাৱনা প্রকট হৈ উঠাত অলপতে গ্রেপ্তাৰ কৰা ড্রাগ্ছ ব্যৱসায়ী জাইড ভিলাট্রাৰ সৈতে সম্পর্ক থকা সৌৱিকক এন চি বিয়ে সোধা–পোছা কৰাটো নিশ্চিত৷ এন চি বিয়ে ড্রাগ্ছ ব্যৱসায়ী ভিলাট্রাৰ পৰা মার্কিন ডলাৰ, ব্রিটিছ পাউণ্ড আৰু ডিৰহামসহ ৯ লাখ ভাৰতীয় টকা উদ্ধাৰ কৰিছে৷ মুম্বাইৰ বান্দ্রাত ৰেষ্টুৰেণ্ট চলোৱা ভিলাট্রাই সৌৱিক চক্রৱর্তী আৰু অভিনেতা ৰাজপুতৰ গৃহ মেনেজাৰ ছেমুৱেল মীৰান্দাক ড্রাগ্ছ যোগান ধৰিছিল৷ এইক্ষেত্রত আব্দুল বছিক পৰিহাৰ নামৰ লোক এজনে মধ্যভোগীৰ ভূমিকা পালন কৰিছে৷ মধ্যভোগী পৰিহাৰকো এন চি বিয়ে সোধা–পোছা কৰিছে৷ সূত্র মতে এন চি বিয়ে পৰিহাৰক গ্রেপ্তাৰ কৰিছে৷ আনপিনে, সুশান্ত সিং গোচৰৰ তদন্ত চলাই থকা আন এটা সংস্থা এনফ’চমেণ্ট ডিৰেক্টৰেটে অভিনেতাগৰাকীৰ গার্ল ফ্রেণ্ড ৰিয়া চক্রৱর্তীক অভিনেতাগৰাকীৰ বেংক একাউণ্টক লৈ কেইবাবাৰো সোধা–পোছা কৰিছে৷ এই সোধা–পোছাৰ অন্তত ই ডিয়ে ড্রাগ্ছ ব্যৱসায়ীৰ সৈতে হোৱাটছএপযোগে ৰিয়া চক্রৱর্তী ড্রাগ্ছ সম্পর্কীয় বার্তালাপ কৰাৰ তথ্য লাভ কৰিছে৷ এই তথ্যৰ আধাৰতেই ই ডিয়ে ৰাষ্ট্রীয় স্নুকাৰ আৰু বিলিয়ার্ড খেলুৱৈ ঋষভ ঠক্কৰক চমন জাৰি কৰি কালি ৮ ঘণ্টা ধৰি জেৰা কৰে৷ মুম্বাইৰ জুহুৰ বাসিন্দা ঠক্কৰৰ সৈতে ৰিয়াই বার্তালাপ কৰাৰ সমান্তৰালকৈ কুনাল জানি নামৰ হোটেল ব্যৱসায়ীৰ সৈতেও ৰিয়াই বার্তালাপ কৰিছিল৷ ব্যৱসায়ী কুনাল জানিকো ইতিমধ্যে ই ডিয়ে জেৰা কৰিছে৷ লক্ষণীয় যে অভিনেতা সুশান্তৰ ৰহস্যজনক মৃত্যুৰ গোচৰৰ তদন্ত চি বি আইৰ লগতে বিভিন্ন কোণেৰে ই ডি আৰু এন চি বিয়েও সমান্তৰালকৈ তদন্ত চলাই আছে৷ অভিনেতাজনৰ ৰহস্যজনক মৃত্যুৰ গোচৰত ড্রাগ্ছ ব্যৱসায়ী জড়িত থকাৰ তথ্য ক্রমান্বয়ে স্পষ্ট হোৱাৰ দিশে আগবাঢ়িছে৷