নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

পোহৰলৈ আহিব উচ্চতম ন্যায়ালয়ৰ ন্যায়াধীশৰ সম্পত্তিৰ তথ্য

🔹 সম্পত্তিৰ হিচাপ ৰাজহুৱা কৰিবলৈ সন্মতি

🔹 প্রাক্তন ন্যায়াধীশৰ বাসগৃহত বৃহৎ অংকৰ ধন উদ্ধাৰৰ পিছতে বিতর্ক

নিউজ ডেস্ক, ৪ এপ্রিল : পোহৰলৈ আহিব উচ্চতম ন্যায়ালয়ৰ ন্যায়াধীশসকলৰ সম্পত্তিৰ হিচাপ৷ ন্যায়িক ব্যৱস্থাৰ প্রতি সাধাৰণ জনতাৰ আস্থা অক্ষত ৰাখিবলৈ উচ্চতম ন্যায়ালয়ৰ মুখ্য ন্যায়াধীশ সঞ্জীৱ খান্নাই সর্বোচ্চ ন্যায়ালয়ৰো ৩০গৰাকী ন্যায়াধীশৰ সম্পত্তিৰ তালিকা ৰাজহুৱা কৰাৰ সিদ্ধান্ত ঘোষণা কৰিছে৷ দিল্লী উচ্চ ন্যায়ালয়ৰ ন্যায়াধীশ হৈ থকাৰ সময়তে যশৱন্ত বার্মাৰ বাসগৃহত বৃহৎ অংকৰ নগদ ধন উদ্ধাৰ হোৱাৰ বিতর্কই ন্যায়িক ব্যৱস্থাৰ প্রতি আস্থাৰ ওপৰত সন্দেহ বৃদ্ধি পোৱাৰ পৰিপ্রেক্ষিততে সর্বোচ্চ ন্যায়ালয়ৰ মুখ্য ন্যায়াধীশ সঞ্জীৱ খান্নাই ন্যায়াধীশৰ সম্পত্তি ৰাজহুৱা কৰাৰ সিদ্ধান্ত লৈছে৷ সর্বোচ্চ ন্যায়ালয়ৰ বৈঠকত যোৱা এক এপ্রিলত গ্রহণ কৰা সিদ্ধান্ত অনুসৰি ন্যায়ালয়ৰ ৩০গৰাকী ন্যায়াধীশে তেওঁলোকৰ সম্পত্তি ৰাজহুৱা কৰিব৷ উচ্চতম ন্যায়ালয়ৰ ৱেবছাইটযোগে ৩০গৰাকী ন্যায়াধীশে তেওঁলোকৰ সম্পত্তি ৰাজহুৱা কৰিব৷ উল্লেখ্য যে ১৯৯৭ চনৰ প্রস্তাৱ অনুসৰি উচ্চতম ন্যায়ালয়ৰ ন্যায়াধীশসকলে তেওঁলোকৰ সম্পত্তিৰ তালিকা মুখ্য ন্যায়াধীশৰ ওচৰত ঘোষণা কৰিব লাগিছিল৷ তদুপৰি ২০০৯ চনত লোৱা সিদ্ধান্তই ন্যায়াধীশসকলৰ সম্পত্তিৰ তালিকা আদালতৰ ৱেবছাইটত ৰাজহুৱা কৰাৰ ক্ষেত্রত ন্যায়াধীশৰ ইচ্ছাৰ ওপৰত নির্ভৰশীল আছিল৷ কিন্তু দিল্লী উচ্চ ন্যায়ালয়ৰ প্রাক্তন ন্যায়াধীশ যশৱন্ত বার্মাৰ বিতর্কৰ পিছতে উচ্চতম ন্যায়ালয়ে ন্যায়াধীশৰ সম্পত্তিৰ তালিকা ৰাজহুৱা কৰাৰ সিদ্ধান্ত লয়৷ ইতিমধ্যে মুখ্য ন্যায়াধীশ সঞ্জীৱ খান্না, ন্যায়াধীশ ভূষণ ৰামকৃষ্ণ গাভাই, ন্যায়াধীশ বি ভি নাগাৰত্ন, ন্যায়াধীশ বিক্রম নাথ আৰু ন্যায়াধীশ জে কে মহেশ্বৰীয়ে তেওঁলোকৰ সম্পত্তিৰ তালিকা উচ্চতম ন্যায়ালয়ৰ ৱেবছাইটত আপলোড কৰিবলৈ কর্তৃপক্ষক নির্দেশ দিছে৷

You might also like