🔹 ড্রাগছসহ গ্রেপ্তাৰ হৈ হেৰুৱালে চাকৰি
নিউজ ডেস্ক, ৫ এপ্রিল : ড্রাগছসহ গ্রেপ্তাৰ হৈছিল বুধবাৰে৷ এইবাৰ চাকৰিটো হেৰুৱাবলগীয়া হ’ল পঞ্জাব আৰক্ষীৰ মহিলা কনিষ্টবল অমনদীপ কৌৰে৷ আৰক্ষী সূত্রই সদৰী কৰা অনুসৰি, অমনদীপৰ বিৰুদ্ধে ইয়াৰ পূর্বেও একাধিকবাৰ অভিযোগ উঠিছিল৷ সতর্ক কৰা হৈছিল যদিও ওপৰ মহলৰ নির্দেশক কোনো গুৰুত্ব নিদি ছ’চিয়েল মিডিয়াত ৰীল বনাইছিল অমনদীপে৷ সেই শৃংখলা ভংগৰ অভিযোগত নিলম্বন কৰা হৈছিল মহিলাগৰাকীক৷ কিন্তু শেহতীয়াকৈ ড্রাগ্ছসহ গ্রেপ্তাৰ হৈছে অমনদীপ৷ গতিকে, এইবাৰ চাকৰিৰ পৰা বর্খাস্ত কৰা হৈছে অমনদীপক৷ আৰক্ষী সূত্রই সদৰী কৰা অনুসৰি, ১৭ গ্রাম হেৰ’ইনসহ গ্রেপ্তাৰ হৈছে অমনদীপক৷ অমনদীপৰ বিৰুদ্ধে তদন্তত নামি শীর্ষ আৰক্ষী বিষয়াসকলৰ চকু কপালত উঠিছে৷ কাৰণ অমনদীপৰ আছে কেইবাখনো বিলাসবহুল গাড়ী আৰু দুই কোটি টকা মূল্যৰ প্রাসাদ৷ ইয়াৰ উপৰি বহু দামী বাইক আছে অমনদীপৰ৷ আৰক্ষী কনিষ্টবলৰ চাকৰি কৰি কেনেদৰে এই সম্পদ উপার্জন কৰা সম্ভৱ, তাক লৈ ইতিমধ্যে চর্চা চলিছে৷