🔹 তিনিজন গঞাক বচাবলৈ পাঁচজনৰ কুঁৱাত জাঁপ
নিউজ ডেস্ক, ৫ এপ্রিল : মেলাৰ পূর্বে কুঁৱা পৰিষ্কাৰ কৰিবলৈ নামিছিল গাঁৱৰ তিনিজন বাসিন্দা৷ বিষাক্ত গেছত হঠাৎ অসুস্থ হৈ পৰে তেওঁলোক৷ প্রতিৱেশীসকলে বিপদ বুজিব পাৰি তেওঁলোকক ৰক্ষা কৰিবলৈ চেষ্টা চলায়৷ তাৎক্ষণিকভাৱে দুর্গত তিনিজন শ্রমিকৰ জীৱন ৰক্ষা কৰিবলৈ পাঁচজন প্রতিৱেশীয়ে কুঁৱাত জাঁপ দিয়ে৷ কিন্তু বিষাক্ত গেছৰ বলি হৈ আটাইকেইজনে প্রাণ হেৰুৱায়৷ এই মর্মান্তিক ঘটনা ঘটিছে মধ্যপ্রদেশৰ খান্দোৱাত৷ মধ্যপ্রদেশৰ খান্দোৱা জিলাৰ কোন্দাবত গাঁৱত গাংগৌৰ উৎসৱ আছিল পৰহি ৷ গাঁওখনত এটাই মাত্র কুঁৱা৷ এই কুঁৱাটোৰ পানী সকলোৱে ব্যৱহাৰ কৰে৷ গাঁৱৰ কোনোধৰণৰ পূজা হ’লে বা উৎসৱ হ’লে প্রতিমা এই কুঁৱাতেই পেলোৱা হয়৷ এক সর্বভাৰতীয় সংবাদ মাধ্যমৰ প্রতিবেদন অনুসৰি, গাংগৌৰ উৎসৱৰ পূর্বে কুঁৱাটো পৰিষ্কাৰৰ বাবে নামিছিল তিনিজন বাসিন্দা৷ কিন্তু কুঁৱাত নমাৰ পাছতে বিষাক্ত গেছত অসুস্থ হৈ পৰে তেওঁলোক৷ অসুস্থ হৈ যোৱা তিনিজনেই ডুবি গৈছিল কুঁৱাত৷ তিনিওজনক বচাবলৈ অন্য পাঁচজনে কুঁৱাত জাঁপ দিয়ে৷ কিন্তু কুঁৱাত নামি এই পাঁচজন বাসিন্দাও বিষাক্ত গেছত অসুস্থ হৈ পৰে৷ আটাইকেইজনৰে এই বিষাক্ত গেছত আক্রান্ত হৈ শোকাৱহ মৃত্যু হয়৷