নিয়মীয়া বাৰ্তা ডিজিটেল, ২৮ আগষ্টঃ ৰাখে হৰি মাৰে কোনে তেলেংগানাৰ এগৰাকী মহিলাই যিধৰণে ৰে’ল দুর্ঘটনাৰ পৰা ৰেহাই পালে, শৰীৰত সামান্য জখমো নহ’ল সেয়া দেখিলেই এই বাক্যশাৰী সকলোৰে মনলৈ আহিব৷ মহিলাৰ শৰীৰৰ ওপৰেৰে চলি যায় এখন মালবাহী ৰে’ল৷ মালবাহী ৰে’লখনে মহিলাগৰাকীক অতিক্রমি গ’ল যদিও মহিলাগৰাকী অক্ষত হৈ থাকিল৷ ইয়াৰ পাছতে মহিলাগৰাকী বহি উঠিল৷ এই অলৌকিক কাণ্ডৰ ভিডি’ ছ’চিয়েল মিডিয়াত ভাইৰেল হৈ পৰিছে৷ সংবাদ সূত্রই সদৰী কৰা অনুসৰি এই ঘটনাটো ঘটিছে তেলেংগানাৰ ভিকাৰাবাদ জিলাৰ নাভাণ্ডগিৰিত৷ বান্ধৱীৰ সৈতে ৰে’ললাইন পাৰ হৈছিল এই মহিলাই৷ সেই সময়ত লাইনেৰে আহি আছিল এখন মালবাহী ৰে’ল৷ লাহে লাহে আহি থকা মালবাহী ৰে’লখন দুয়োগৰাকী মহিলাৰ নজৰলৈ অহা নাছিল৷ সন্মুখতে হঠাতে ৰে’লখন দেখি মহিলাগৰাকীৰ বান্ধৱীয়ে দ্রুতগতিত ৰে’ল লাইনৰ পৰা আঁতৰি যায়৷ কিন্তু এই মহিলাই ৰে’ল লাইন পাৰ হ’ব নোৱাৰি উপস্থিত বুদ্ধি খটুৱাই শুই পৰে৷ দুই চিৰিৰে ৰে’ল পাৰ হৈ গ’ল৷ ইয়াৰ মাজতে শুই থাকিল বুদ্ধিমতী মহিলাগৰাকী৷ ৩০ ছেকেণ্ডৰ ভাইৰেল ভিডি’ত দেখিবলৈ পোৱা গৈছে মহিলাগৰাকী শুই আছে আৰু লাহে লাহে গৈ আছে মালবাহী ৰে’লখন৷ শেষ পর্যন্ত ৰে’লখন পাৰ হৈ যোৱাৰ পাছত গাৰ ধূলি জোকাৰি বহি উঠে মহিলাগৰাকী৷ উপস্থিত বুদ্ধিৰ জৰিয়তে সম্পূর্ণ অক্ষত অৱস্থাত থাকিল মহিলাগৰাকী৷ অৱশ্যে মহিলাগৰাকীৰ সবিশেষ পৰিচয় জানিব পৰা হোৱা নাই৷ ৰে’ল বিভাগৰ তৰফৰ পৰাও এই ঘটনা সন্দর্ভত কোনোধৰণৰ প্রতিক্রিয়া প্রকাশ কৰা হোৱা নাই৷